Անսպասելի բացահայտում․ համատեղ երգելն օգնում է մարդկանց ավելի լավ աշխատել կոլեկտիվում

Համատեղ երգելը կարող է ամրապնդել միասնականության զգացումը և նպաստել կոլեկտիվում ավելի արդյունավետ աշխատանքին։ Այս եզրակացությանն են եկել հետազոտողները, որոնք ուսումնասիրել են, թե ինչպես է երգերի խմբակային կատարումն ազդում մարդկանց միջև փոխգործակցության վրա։ Աշխատանքը հրապարակվել է Proceedings of the Royal Society B ամսագրում։

Գիտնականներն անցկացրել են մի շարք փորձեր, որոնց ընթացքում կամավորները միասին երգեր, ապա առաջադրանքներ են կատարել, որոնք պահանջում էին համակարգվածություն և համագործակցություն։

Պարզվել է, որ համատեղ երգելուց հետո մասնակիցներն ավելի լավ են սինքրոնացրել իրենց գործողությունները, ավելի արագ են համաձայնության եկել և միմյանց նկատմամբ ցուցաբերել են վստահության ավելի բարձր մակարդակ։

Հեղինակների կարծիքով՝ ազդեցությունը կապված է այն բանի հետ, որ երգելը պահանջում է շնչառության, ռիթմի և ինտոնացիայի համաձայնեցում։ Այդպիսի սինքրոնացումը ակտիվացնում է սոցիալական համախմբվածության մեխանիզմները, որոնք պատմականորեն օգնել են մարդկանց գործել միասին՝ որսից և աշխատանքից մինչև ծեսեր ու տոնակատարություններ։

Հետազոտողների կարծիքով՝ խմբակային երգելը կարող է լինել աշխատանքային կոլեկտիվներում, դպրոցական խմբերում և նույնիսկ թերապևտիկ ծրագրերում փոխգործակցությունը բարելավելու պարզ և հասանելի միջոց։

Source: https://news.am/hy/news/1035602