Երուսաղեմում հնագետները հայտնաբերել են 1500 տարվա հնություն ունեցող հին ճանապարհի մի հատված, որը, հավանաբար, օգտագործվել է որպես ուխտավորների՝ դեպի քաղաքի կրոնական սրբավայրերը տանող երթուղի։

Հետազոտության արդյունքները հրապարակվել են Atiquot հանդեսում։

Հայտնագործությունն արվել է այսպես կոչված Դավթի քաղաքի շրջանում՝ նոր զբոսաշրջային կենտրոնի կառուցումից առաջ իրականացված պեղումների ընթացքում։

Խոսքը բազմաշերտ հնագիտական գոտու մասին է, որտեղ ավելի ուշ կառուցված շինությունների տակ հայտնաբերվել են բյուզանդական շրջանի փողոցի մնացորդներ, ինչպես նաև ավելի վաղ՝ Հռոմեական կայսրության ժամանակների և նույնիսկ Երկրորդ Տաճարի ժամանակաշրջանի կառույցներ։

Հետազոտողների տվյալներով՝ հենց այս երթուղին կարող էր կապել հին քաղաքի հարավային հատվածն այն շրջանների հետ, որոնք տանում էին դեպի Տաճարի լեռ։

Առանձնահատուկ հետաքրքրություն է ներկայացնում ճանապարհի լավ պահպանված հատվածը, որը, հնագետների գնահատմամբ, օգտագործվել է ուխտավորների կողմից, որոնք Սիլոամի ավազանի շրջանից բարձրանում էին դեպի քաղաքի գլխավոր կրոնական կենտրոնները։

Երթուղու երկայնքով հայտնաբերվել են քաղաքային ենթակառուցվածքի տարրեր, այդ թվում՝ ջրահեռացման համակարգեր և տարբեր դարաշրջանների շինարարական կառույցներ։

Գիտնականները նշել են, որ այս բացահայտումն օգնում է ավելի լավ հասկանալ, թե ինչ տեսք ուներ Երուսաղեմի հին քաղաքային միջավայրը և ինչպես է այն զարգացել ավելի քան հազար տարի շարունակ՝ անընդհատ վերակառուցվելով, սակայն պահպանելով տեղաշարժի հիմնական ուղիները։

Source: https://news.am/hy/news/1035608