Գերմանական ավտոարտադրող BMW-ն Իտալիայում Villa d’Este-ի էլեգանտության մրցույթում ներկայացրել է Vision Alpina կոնցեպտը՝ ուրվագծելով Alpina բրենդի զարգացման ուղղությունը՝ այն բանից հետո, երբ այն ամբողջությամբ անցել է BMW Group-ի վերահսկողության տակ, հայտնում է Autocar-ը։

Կոնցեպտը դարձել է նոր ռազմավարության առաջին հրապարակային ազդանշանը, որի շրջանակում Alpina-ն կդիրքավորվի BMW-ի ստանդարտ մոդելներից ավելի բարձր, բայց Rolls-Royce-ի առաջատար բրենդից՝ ավելի ցածր։

Vision Alpina-ն ստեղծվել է խոշոր գրան-տուրերի ձևաչափով՝ մոտ 5,2 մետր երկարությամբ, ինչը համադրելի է Rolls-Royce Wraith-ի հետ։

Կոնցեպտը նախատեսված չէ սերիական արտադրության համար, սակայն դիտարկվում է որպես Alpina-ի ապագա ավտոմոբիլային շարքի ոճական և գաղափարական ուղենիշ։

BMW-ի տվյալներով՝ Alpina-ի նոր սերնդի առաջին սերիական մոդելը կհիմնվի BMW 7 Series-ի վրա և կներկայացվի 2027 թվականին, իսկ մատակարարումները կսկսվեն 2028 թվականի սկզբին։ Հետագայում շարքում նախատեսվում է ներառել նաև փոփոխված BMW X7-ը։

Քննարկվում է նաև ամբողջությամբ էլեկտրական մոդել, սակայն առաջին փուլում առաջնահերթությունը պահպանվում է ներքին այրման շարժիչներով ավտոմեքենաների համար։

Vision Alpina-ի դիզայնը հղում է անում բրենդի ժառանգությանը՝ ներառելով դասական մոդելների տարրեր, ինչպիսին է 1978 թվականի B7 Turbo-ն։ Արտաքնապես կոնցեպտը ստացել է բնորոշ «շնաձկային» դիմային մաս։ Deko Set ֆիրմային գծերի թարմացված գրաֆիկան այժմ կկատարվի ձեռքով, ոչ թե կպչունների տեսքով, ինչը ընդգծում է բրենդի անցումը դեպի ավելի պրեմիում սեգմենտ։

Ձևավորման մեջ օգտագործվում է նաև զուսպ քրոմ՝ ներշնչված դասական BMW 507-ով, իսկ կոնցեպտի ընդհանուր ուրվագիծը հիմնված է BMW-ի սերիական մոդելների ճարտարապետության վրա։

Vision Alpina-ի սրահը ձևավորված է ընդգծված լյուքս ոճով․ օգտագործվում են Lavalina կաշի, բաց փայտյա տարրեր, ժամագործական արվեստից ներշնչված մշակմամբ մետաղական դետալներ, ինչպես նաև մթնոլորտային լուսավորության բարդ համակարգ։ Հետևի հատվածում նախատեսված են ներկառուցված տարրեր բյուրեղապակյա աքսեսուարների պահպանման համար, ինչը ընդգծում է Mercedes-Maybach-ի և Range Rover-ի մակարդակին հավասարվելու ուղղվածությունը՝ Ferrari-ին մոտ բացառիկության տարրերով։

Տեխնիկապես կոնցեպտը համալրված է առջևում երկայնական տեղադրմամբ V8 շարժիչով, ընդ որում BMW-ն ընդգծում է, որ կարգավորումները միտված կլինեն սահունությանը և հարմարավետությանը, ոչ թե սպորտային ագրեսիվությանը։

Alpina-ի ղեկավարությունը նշում է, որ արտադրության ծավալները կմնան մոտավորապես նախկին ժամանակաշրջանի մակարդակին՝ տարեկան շուրջ 2500 ավտոմեքենա։ Միաժամանակ բրենդը աստիճանաբար կտեղափոխվի շուկայի ավելի բարձր սեգմենտներ՝ կենտրոնանալով Maybach-ի և Range Rover-ի հետ մրցակցության վրա՝ պահպանելով սահմանափակ բացառիկությունը։

BMW-ում ընդգծում են, որ Alpina-ի զարգացման նոր փուլը կառուցվում է բրենդի ժառանգության և ավելի պրեմիում դիրքավորման համադրության վրա, ինչպես նաև մոդելային շարքի աստիճանական ընդլայնման՝ հարմարավետության և «աննկատ» դինամիկայի վրա ավանդական շեշտադրումը պահպանելով։

Source: https://news.am/hy/news/1036041