Հանրապետականների փորձը՝ դաշնային բյուջեից 1 միլիարդ դոլար հատկացնել ԱՄՆ նախագահ Դոնալդ Թրամփի՝ Սպիտակ տանը նոր պարահանդեսային սրահ կառուցելու նախագծի ֆինանսավորման համար, Սենատում բախվել է լուրջ խոչընդոտի, հայտնում է NBC News-ը։

Սենատի խորհրդարանական իրավախորհրդատու Էլիզաբեթ Մակդոնոն որոշել է, որ օրինագիծն իր ներկայիս տեսքով խախտում է ընթացակարգային կանոնները, քանի որ շոշափում է այնպիսի հարցեր, որոնք դուրս են գալիս համապատասխան հանձնաժողովների իրավասության սահմաններից։

Սա նշանակում է, որ փաստաթուղթը չի կարող ընդունվել ձայների պարզ մեծամասնությամբ և, հավանաբար, կպահանջի 60 սենատորի աջակցություն, ինչը հանրապետականները, ամենայն հավանականությամբ, չեն կարողանա ապահովել։

Այս որոշումը զգայուն հարված դարձավ նախաձեռնությանը, որը ավելի լայն բյուջետային փաթեթի մի մասն է և նախատեսում է ֆինանսավորում Գաղտնի ծառայության, Ներգաղթի և մաքսային ոստիկանության ու Սահմանապահ ծառայության համար։

Պաշտոնապես Սպիտակ տունը պնդում է, որ պահանջվող միջոցները նախատեսված են ոչ թե հենց պարահանդեսային սրահի, այլ նախագծի հետ կապված անվտանգության միջոցառումների և ենթակառուցվածքների արդիականացման համար։ Սակայն քննադատները կարծում են, որ խոսքը թանկարժեք նախագծի անուղղակի ֆինանսավորման մասին է, որը Թրամփը նախկինում խոստացել էր իրականացնել բացառապես մասնավոր նվիրատվությունների հաշվին։

Ըստ NBC News-ի, հանրապետականներն արդեն մի քանի օր է աշխատում են փաստաթղթի նոր խմբագրության վրա և հույս ունեն վերացնել ընթացակարգային նկատողությունները։ Այնուամենայնիվ, դեռևս անհասկանալի է մնում, թե արդյոք նրանց կհաջողվի փոխել տեքստն այնպես, որ նախագիծը համապատասխանի բյուջետային գործընթացի պահանջներին։ Եթե Սենատի մասնագետները կրկին որոշեն, որ ֆինանսավորումը պատկանում է այլ հանձնաժողովների իրավազորությանը, ապա միջոցների հատկացման մասին դրույթը կարող է ամբողջությամբ հանվել օրինագծից։

Սկզբում Թրամփը շինարարության արժեքը գնահատում էր 400 միլիոն դոլար և ընդգծում, որ պետական միջոցներ չեն օգտագործվելու։

Այժմ բյուջեից 1 միլիարդ դոլար հատկացնելու քննարկումը սրել է քաղաքական վեճերը և կասկածի տակ դրել նրա երկրորդ նախագահական ժամկետի ամենահավակնոտ ճարտարապետական նախագծերից մեկի իրականացման հնարավորությունը։

Source: https://news.am/hy/news/1036005