ՌԴ քաղաքացին ձերբակալվել է թուրքական Անթալիայում՝ կենդանիների նկատմամբ դաժան վերաբերմունքի կասկածանքով, նա սպասում է արտաքսման, «РИА Новости»-ին հայտնել են ՌԴ գլխավոր հյուպատոսությունից։

Թուրքական լրատվամիջոցների տվյալներով՝ տղամարդը ոտքով հարվածել է մի կատվի, որին կերակրում էին տեղացի առևտրականները, ապա նաև մի շան։ Տեսահսկման տեսախցիկների տեսագրությունները հրապարակվել են սոցիալական ցանցերում, ինչից հետո ոստիկանությունը ձերբակալել է Ռուսաստանի քաղաքացուն։ Նա ցուցմունք է տվել և տեղափոխվել է միգրանտների վերադարձի կենտրոն՝ հետագա արտաքսման համար։

«Առկա տեղեկությունների համաձայն՝ Ռուսաստանի քաղաքացին, որը բնակվում է Անթալիայում՝ կացության թույլտվության հիման վրա, ձերբակալվել է կենդանիների նկատմամբ դաժան վերաբերմունքի կասկածանքով։ Ներկայում նա գտնվում է Անթալիայի արտաքսման կենտրոնում և սպասում է արտաքսման։ Նա գլխավոր հյուպատոսություն դիմումներ չի հղել»,- նշվել է Ռուսաստանի գլխավոր հյուպատոսության հայտարարության մեջ։

Նշվել է, որ ռուս դիվանագետները կապ են հաստատել թուրքական իրավասու մարմինների հետ այս իրավիճակի հետ կապված և պատրաստ են ցուցաբերել անհրաժեշտ հյուպատոսական աջակցություն՝ առկա լիազորությունների շրջանակում։

Source: https://news.am/hy/news/1035940