Ըստ ԵՄ զեկույցի՝ 2025 թվականին Եվրամիությունից արտաքսվածների թվով Վրաստանի քաղաքացիները զբաղեցրել են երկրորդ տեղը՝ զիջելով միայն Թուրքիայի քաղաքացիներին, գրում է OC Media-ն:

Ըստ վիճակագրության՝ ԵՄ-ից արտաքսվել է 13 հազար 405 թուրք, որոնց հաջորդում են վրացիները՝ 10 հազար 475 մարդ։ Երրորդ տեղում սիրիացիներն են (8370 մարդ), ապա ալբանացիները (8020 մարդ) և ռուսաստանցիները (5727 մարդ)։

2025 թվականի տվյալներով՝ պարզվել է, որ Վրաստանի 16 հազար 230 քաղաքացի անօրինական կերպով գտնվել է ԵՄ-ում։ Եվրոպական հանձնաժողովի վիճակագրական վարչության՝ Eurostat-ի հրապարակած թվերը ցույց են տալիս, որ ընդհանուր առմամբ ԵՄ-ից դուրս գալու հրաման է ստացել ԵՄ անդամ չհանդիսացող երկրների 491 հազար 950 քաղաքացի, ինչը 2024 թվականի համեմատ 5,8%-ով ավելի է։

Նրանցից 135 հազար 460-ը լքել է Եվրամիությունը։ Գերմանիան արտաքսել է ամենամեծ թվով վրացիներին՝ 2025 թվականին վերադարձնելով 2805 մարդու։ Գերմանիան նաև գրանցել է իր տարածքում անօրինական գտնվող Վրաստանի քաղաքացիների ճնշող մեծամասնությունը՝ 6300 մարդ։

Լեհաստանը զբաղեցրել է երկրորդ տեղը արտաքսումների թվով. 1965 մարդ վերադարձվել է երրորդ երկրներ։

Տվյալները ցույց են տալիս, որ Եվրամիությունը լքելու հրաման ստացած վրացիների թիվը մշտապես աճում է՝ 2024 թվականին հասնելով առավելագույնին բոլոր մյուս ազգությունների շարքում և կազմելով 12 հազար 50 մարդ։

Ըստ վիճակագրության՝ վրացիները զբաղեցրել են յոթերորդ տեղը այն ազգությունների շարքում, որոնց մերժվել է մուտքը Եվրամիություն 2025 թվականին (ընդհանուր՝ 4785 մարդ)։ Համեմատության համար՝ 2024 թվականին մուտքը մերժվել է 4825 անձի, 2023-ին՝ 4320-ի, իսկ 2022-ին՝ 5640-ի։

Ինչպես նշում է կայքը, Եվրամիության վիճակագրությունը ուղղակիորեն չի նշում արտաքսումների պատճառները։

Լեհաստանը, որը վրացի աշխատողների համար Եվրամիությունում հայտնի ուղղություն է, 2025 թվականի նոյեմբերին հրապարակել է կանոններ, որոնք չեղարկում են վրացիների համար աշխատանքի տեղավորման պարզեցված ընթացակարգերը։

2024 թվականին վրացիները կազմում էին Լեհաստանի կողմից արտաքսված բոլոր օտարերկրացիների մեկ երրորդը՝ 2500 մարդ։ Լեհաստանի ոստիկանության տվյալներով՝ Վրաստանի քաղաքացիները կատարել են ամենամեծ թվով հանցագործությունները մեկ շնչի հաշվով՝ բոլոր մյուս օտարերկրացիների համեմատ, ընդ որում՝ ոստիկանությունը հայտարարում է, որ վրացիների շրջանում հանցավորության մակարդակը 2020 թվականից ի վեր կրկնապատկվել է։

Source: https://news.am/hy/news/1035536