Միջազգային օգնություն ստանալու մեր երկրի փորձը, ներառյալ՝ Միացյալ Նահանգներից, ծավալուն է և կառուցողական: Ցանկացած դոնոր կարող է հաստատել դա: Դրա մասին X սոցիալական ցանցում գրել է Կուբայի նախագահ Միգել Դիաս-Կանելը:

«Եթե ԱՄՆ կառավարությունն իսկապես պատրաստակամ է տրամադրելու օգնություն այն ծավալներով, որոնց մասին հայտարարում է, և մարդասիրական օգնության համընդհանուր սկզբունքներին լիակատար համապատասխան, նա Կուբայի կողմից չի հանդիպի ոչ մի խոչընդոտի կամ ապերախտության, որքան էլ որ այդ առաջարկը հակասական և պարադոքսալ թվա մի ժողովրդի համար, որին հենց ԱՄՆ կառավարությունը համակարգված ու անխնա ենթարկում է հավաքական պատժի:

Առաջնահերթություններն ավելի քան ակնհայտ են՝ վառելիք, սնունդ և դեղորայք:

Ի դեպ, հետևանքները հնարավոր կլիներ մեղմել շատ ավելի պարզ և արագ, եթե չեղարկվեր կամ գոնե թուլացվեր շրջափակումը, քանի որ քաջ հայտնի է, որ հումանիտար իրավիճակը գիտակցաբար հաշվարկված է և արհեստականորեն ստեղծված:

Կաթոլիկ եկեղեցու հետ համագործակցության մեր փորձը հարուստ է և արդյունավետ»,- նշել է նա:

Source: https://news.am/hy/news/1035541