Բարգավաճ Հայաստան կուսակցության առաջնորդ Գագիկ Ծառուկյանի մամուլի խոսնակ Իվետա Տոնոյանը ասուլիսում անդրադարձել է վարչապետ Նիկոլ Փաշինյանի վերջին հայտարարություններին՝ կապված Գագիկ Ծառուկյանի և նրա ընտանիքի անդամների վերաբերյալ հնչեցված գնահատականների հետ, ինչպես նաև ընտրական քարոզարշավի ընթացքին։

Տոնոյանի խոսքով՝ ինքը վստահ է, որ քաղաքացիների՝ ԲՀԿ-ին քվե տալու որոշման վրա նման հայտարարությունները չեն ազդի, քանի որ, ըստ նրա, խոսքը վերաբերում է երկար տարիների քաղաքական փորձ ունեցող գործընթացի։

«Ես առավել քան վստահ եմ, որ բոլոր այն մարդիկ, ովքեր ունեն որոշում հունիսի յոթին իրենց վստահության քվեն Բարգավաճ Հայաստան կուսակցությանը տալու, որևէ դեպքում նրանց վրա սա չի անդրադառնալու, որովհետև որևէ մեկի համար նորություն չէ, որ Նիկոլ Փաշինյանը այսպես քաղաքական մանիպուլյացիաների և այդ հռետորաբանության այսպես փայլուն օրինակ է և ժամանակ առ ժամանակ, երբ անհրաժեշտություն կա հանրության ուշադրությունը այս կամ այն թեմայից շեղելու, նա հանդես է գալիս նման լեքսիկոնով, նման սպառնալիքների լեզվով, պարբերաբար այսպես պատերին ծեփելու, ասֆալտին փռելու սպառնալիքներով», — հայտարարել է Տոնոյանը։

Նա նշել է, որ վերջին տարիներին հասարակությունը բազմիցս ականատես է եղել նման խոսույթների, և դա, նրա կարծիքով, նոր երևույթ չէ։

Տոնոյանը նաև կասկածի տակ է դրել իշխանությունների դիրքորոշումը իրավական գործընթացների նկատմամբ՝ նշելով, որ վարչապետը, ըստ իր գնահատման, փորձում է ուղղակի ազդեցություն ունենալ իրավապահ համակարգի վրա։

«Նիկոլ Փաշինյանը միանձնյա իրեն վերապահել է բոլոր այս համակարգերի աշխատանքի կանոնակարգման գործառույթը։ Ես որևէ տրամաբանություն այս դեպքում չեմ տեսնում», — ասել է նա։

ԲՀԿ խոսնակը անդրադարձել է նաև անմեղության կանխավարկածի սկզբունքին՝ ընդգծելով, որ քաղաքական հայտարարությունները չեն կարող փոխարինել իրավական գնահատականներին։

Տոնոյանը ցավով նշել է, որ իր գնահատմամբ՝ ընտրարշավի մեկնարկից մեկ շաբաթ անց քաղաքական պայքարը գտնվում է լարված և ոչ կառուցողական փուլում։

«Շատ ցավում եմ, որ քաղաքական պայքարը քարոզարշավի մեկնարկից մեկ շաբաթ անց այսօր գտնվում է այս փուլում», — նշել է նա։

Հարցին՝ ինչու է, իր կարծիքով, Գագիկ Ծառուկյանը և ԲՀԿ-ն թիրախավորվում, Իվետա Տոնոյանը պատասխանել է, որ դա կապված է կուսակցության վարկանիշի հետ։

«Ես առավել քան վստահ եմ, որ իրենք տիրապետում են սոցիոլոգիական հարցումներին, և կարծում եմ, որ այս ցայտնոտային վիճակի հիմնական պատճառներից մեկը նաև Բարգավաճ Հայաստան կուսակցության Գագիկ Ծառուկյանի շատ բարձր վարկանիշն է», — ասել է նա։

Նա հավելել է, որ իշխանությունների կողմից կիրառվող խոսույթը, ըստ իր գնահատման, արձանագրվում և քննադատվում է նաև տարբեր սոցիոլոգիական դիտարկումներում։

Տոնոյանը նաև քննադատել է իշխանություններին՝ նշելով, որ նրանք, իր խոսքով, հակասում են իրենց իսկ հռչակած ժողովրդավարական արժեքներին։

«Ինձ համար սա ցավալի փաստ է, բայց կրկնում եմ՝ ես առավել քան վստահ եմ, որ մեր ազգաբնակչությունը ունի բավարար քաղաքացիական և քաղաքական գիտակցություն՝ հունիսի յոթին համարժեք գնահատական տալու», — նշել է նա։

Անդրադառնալով ընդդիմադիր դաշտում հնարավոր զարգացումներին՝ Տոնոյանը նշել է, որ քաղաքական գործընթացները շարունակվում են, և վերջնական գնահատականներ տալ հնարավոր կլինի միայն ընտրություններից հետո։

«Քաղաքականության մեջ որևէ բան չի բացառվում և որևէ բանի մասին չի կարելի այսպես կանխագուշակության սինդրոմով առաջնորդվելով խոսել», — ասել է նա։

Բանավեճերի և Գագիկ Ծառուկյանի հնարավոր մասնակցության հարցին պատասխանելով՝ Իվետա Տոնոյանը նշել է, որ դեռևս վերջնական որոշում չկա։

«Դեռևս քննարկում չկա, որովհետև դեռ բավականաչափ ժամանակ կա, նախընտրական վերջին բանավեճը, կարծեմ, հունիսի 3-ին կամ 4-ին է պլանավորված», — ասել է նա։

Նա ընդգծել է, որ մասնակցության հարցը կորոշվի ավելի ուշ։

Տոնոյանը նաև քննադատել է իշխանությունների խաղաղության վերաբերյալ հայտարարությունները՝ դրանք որակելով որպես քաղաքական շանտաժ։

«Եթե իրենց այսքան չարչրկված խաղաղությունը այլևս իրականություն է, ինչի՞ց են նրանք վախենում», — ասել է նա։

Նրա խոսքով՝ ԲՀԿ-ն բազմիցս հայտարարել է, որ պատերազմը պետք է բացառվի, իսկ երկրի անվտանգությունը պետք է ապահովվի միջազգային գործընկերների հետ համագործակցությամբ և տնտեսության զարգացման միջոցով։

«Սա տարրական և էլեմենտար շանտաժ է, ընդամենը, որով Նիկոլ Փաշինյանը մեր ժողովրդին ենթարկում է շանտաժի», — նշել է Տոնոյանը։

Տոնոյանը նաև քննադատել է կառավարության որոշ ներկայացուցիչների վարքագիծը՝ նշելով, որ նրանք, իր կարծիքով, քաղաքական գործընթացները ներկայացնում են ոչ պատշաճ ձևով։

Նա հատուկ նշել է կառավարության աշխատակազմի ղեկավար Արայիկ Հարությունյանի հայտարարությունները՝ պնդելով, որ դրանք չեն համապատասխանում իրավական նորմերին։

Տոնոյանի խոսքով՝ որոշ անձանց աշխատանքից ազատումների վերաբերյալ գործընթացները եղել են քաղաքականացված։

«Ես ձեզ փոխքաղաքապետերի օրինակը բարձրաձայնեցի… մենք գնալու ենք իրավական ճանապարհով», — ասել է նա՝ նշելով, որ իր գնահատմամբ՝ տեղի են ունեցել քաղաքական դրդապատճառներով ազատումներ։

Ասուլիսի ավարտին Իվետա Տոնոյանը նշել է, որ ԲՀԿ-ն շարունակելու է իր նախընտրական հանդիպումները և փորձելու է պահպանել կառուցողական քաղաքական խոսույթը։

«Շնորհակալություն ուշադրության համար, մեր հանդիպման այս ձևաչափը մենք փորձենք դարձնել ավանդական», — եզրափակել է նա։

Source: https://news.am/hy/news/1035735