Մերձավոր Արևելքում իրավիճակը շարունակում է մնալ լարված և անկայուն։ Իսլամաբադում Իրանի և ԱՄՆ-ի միջև բանակցությունների մասին հաղորդագրությունները արտացոլում են միայն երկխոսություն հաստատելու փորձերը. շփումները կրում են ոչ կանոնավոր բնույթ և առայժմ արդյունք չեն տվել։

Միևնույն ժամանակ Իսրայելը, չնայած հայտարարված հրադադարին, շարունակում է հարվածներ հասցնել Լիբանանի տարածքին, ինչը վկայում է հրադադարի ռեժիմի փաստացի խախտման մասին։ Ընդհանուր առմամբ տարածաշրջանը շարունակում է գտնվել երկարատև էսկալացիայի վիճակում, և հետագա սրման ռիսկերը պահպանվում են։

NEWS.am ներկայացնում է չորեքշաբթի գիշերը Մերձավոր Արևելքում տեղի ունեցած հիմնական իրադարձությունների համառոտ ակնարկը։

ԱՄՆ ռազմաօդային ուժերը (ՌՕՈւ) Իրանի հետ հակամարտության ընթացքում ընդհանուր առմամբ կորցրել են 42 թռչող սարք։ Այդ մասին վկայում է ԱՄՆ Կոնգրեսի հետազոտական ծառայության (CRS) զեկույցը։

ԱՄՆ Սենատը հավանություն է տվել օրինագծին, որը կսահմանափակի նախագահ Դոնալդ Թրամփի ռազմական լիազորությունները, հաղորդում է CNN հեռուստաալիքը։ «Սենատը հավանություն է տվել օրինագծին, որն ուղղված է նախագահ Դոնալդ Թրամփի ռազմական լիազորությունների սահմանափակմանը՝ Իրանի դեմ ցանկացած ապագա ռազմական գործողության համար Կոնգրեսի պարտադիր հաստատում նախատեսելով», — նշվում է հրապարակման մեջ։

Ամերիկայի առաջնորդ Դոնալդ Թրամփը հայտարարել է, որ Միացյալ Նահանգները արագ կավարտեն Իրանի հետ պատերազմը։ «Կարծում եմ՝ մենք սա շատ արագ կավարտենք, և նրանք միջուկային զենք չեն ունենա», — ասել է նա՝ ելույթ ունենալով Կոնգրեսի անդամների համար կազմակերպված փիքնիքի ժամանակ։

Ռազմական գործողությունների վերսկսման դեպքում Մերձավոր Արևելքում Թեհրանը կկարողանա Վաշինգտոնին նոր «անակնկալներ» մատուցել։ Այդ մասին մայիսի 20-ին հայտարարել է Իրանի ԱԳ նախարար Աբբաս Արաղչին։

Source: https://news.am/hy/news/1036773