Մեծ Բրիտանիայի թագավոր Չարլզ III-ի թիկնազորի աշխատակիցներին գտել են աշխատանքի վայրում քնած վիճակում։ Այս մասին հայտնում է «Sun» թերթը՝ հղում անելով ոստիկանությանը։

«Վինձորի ամրոցում թագավորին հսկող զինված ոստիկանների նկատմամբ հետաքննություն է սկսվել այն ցնցող հայտարարություններից հետո, թե նրանք քնել են աշխատանքի ժամանակ»,- գրում է պարբերականը։

Այս տեղեկության համաձայն՝ հետաքննության թիրախում է հայտնվել Բրիտանիայի ոստիկանության մասնագիտացված բաժնի շուրջ 30 աշխատակից։ Թերթն ուշադրություն է հրավիրում նաև այն փաստի վրա, որ թագավորի թիկնազորի որոշ ոստիկաններ մեղադրվում են հերթապահության ներկայանալուց հետո իրենց պոստերը լքելու մեջ։

Աղբյուրը թերթին հայտնել է, որ ոստիկանների նման պահվածքը վտանգ է ստեղծել բրիտանական թագավորի անվտանգության համար։

Բուքինգհեմյան պալատից պարբերականին հայտնել են, որ տեղյակ են հետաքննության մասին, սակայն հրաժարվել են մեկնաբանություններից։

Source: https://news.am/hy/news/1036304