Ավստրալիացի միլիարդատեր Ջինա Ռայնհարթը խոշոր խաղադրույք է կատարում ամերիկյան պաշտպանական հատվածի վրա՝ կտրուկ վերակառուցելով իր Hancock Prospecting ընկերության ներդրումային պորտֆելը գլոբալ աշխարհաքաղաքական լարվածության և ռազմավարական ակտիվների նկատմամբ աճող հետաքրքրության ֆոնին, հայտնում է Reuters-ը։

Ավստրալիայի ամենահարուստ կնոջը պատկանող Hancock Prospecting-ը մոտ 133 միլիոն դոլար է ուղղել իր 3,3 միլիարդ դոլար արժողությամբ ամերիկյան պորտֆելի վերաբաշխմանը՝ ուժեղացնելով դիրքերը պաշտպանական արդյունաբերության, ոսկու և հազվագյուտ հողային մետաղների ոլորտներում։

Մարտին ընկերությունը բաժնեմասեր է ձեռք բերել ամերիկյան պաշտպանական առանցքային հսկաներում, այդ թվում՝ CrowdStrike, L3Harris, Lockheed Martin, Northrop Grumman և RTX ընկերություններում։ Միաժամանակ պորտֆելում ավելացվել է ոսկու արդյունահանման խոշորագույն Newmont ընկերությունը, ինչը ընդգծում է Ռայնհարթի կողմնորոշվածությունը պաշտպանական ակտիվների նկատմամբ՝ համաշխարհային տնտեսության անկայունության պայմաններում։

Բացի այդ, Hancock-ը ձեռք է բերել Rare Earths Americas-ի 6,3%-ը՝ ուժեղացնելով ներկայությունը ռազմավարական կարևորություն ունեցող հազվագյուտ հողային մետաղների հատվածում, որոնք կենսական դեր են խաղում պաշտպանական արդյունաբերության, բարձր տեխնոլոգիաների և էներգետիկ անցման մեջ։

Ընկերությունը նաև մոտ 10%-ով ավելացրել է պղնձի արդյունահանմամբ զբաղվող Hudbay Minerals-ում իր բաժնեմասը՝ միաժամանակ ամբողջությամբ դուրս գալով չիլիական լիթիում արտադրող SQM-ում ներդրումներից՝ չնայած Ավստրալիայում Andover լիթիումի նախագծի համատեղ մշակմանը։

Չնայած պաշտպանության և հումքային ռեսուրսների վրա նոր խաղադրույքին, Hancock-ի խոշորագույն դիրքերը շարունակում են մնալ տեխնոլոգիական Invesco QQQ Trust ֆոնդը և հազվագյուտ հողային նյութերի ամերիկյան արտադրող MP Materials-ը, որոնք միասին կազմում են ընկերության ամբողջ ամերիկյան պորտֆելի գրեթե կեսը։

Source: https://news.am/hy/news/1036267