ԱՄՆ-ի հետ հակամարտության կարգավորման բանակցություններում գլխավոր դժվարությունը Վաշինգտոնից ստացվող հակասական հաղորդագրություններն են։ Այս մասին հայտնել է Իրանի ԱԳ նախարար Աբաս Արաղչին։

«Նրանք չեն կարողանա իրենց նպատակներին հասնել ռազմական ճանապարհով, սակայն եթե ընտրվի դիվանագիտության ուղին, իրավիճակն այլ կլինի։ Մենք արդեն սկսել ենք փոխգործակցությունը, բայց, ինչպես ձեզ հայտնի է, այս ճանապարհին բազմաթիվ խնդիրներ կան։ Ամենագլխավոր խնդիրը հակասական ազդակներն են, որոնք մենք ստանում ենք ամերիկյան կողմից՝ տարբեր հայտարարությունների, հարցազրույցների և պաշտոնական դիրքորոշումների արտահայտման միջոցով», - ասել է նա հնդկական Doordarshan հեռուստաալիքին տված մեկնաբանությունում։

Արաղչիի կարծիքով՝ Վաշինգտոնում արդեն գիտակցել են, որ Իրանի դեմ ռազմական գործողությունների միջոցով չեն կարողանա հասնել որևէ նպատակի։

Մայիսի 10-ին Իրանը Պակիստանին է փոխանցել իր պատասխանը Պարսից ծոցի գոտում հակամարտության կարգավորման վերաբերյալ ամերիկյան առաջարկներին։ Ամերիկյան The Wall Street Journal թերթի աղբյուրների տվյալներով՝ Թեհրանը հրաժարվել է ապամոնտաժել իր միջուկային օբյեկտները, ինչը պնդում է Վաշինգտոնը։ Ինչպես նշել է պարբերականը, իրանական կողմը պատրաստակամություն է հայտնել համաձայնել ուրանի հարստացման կասեցմանը, սակայն ոչ թե ԱՄՆ պահանջած 20 տարով։ Ավելի ուշ ԱՄՆ նախագահ Դոնալդ Թրամփը Թեհրանի պատասխանն անընդունելի է անվանել։

Source: https://news.am/hy/news/1035643