Երկրում կենսամակարդակի անկման հետ կապված զանգվածային բողոքի ցույցերը հնարավոր է համարում Ռուսաստանի քաղաքացիների 20 տոկոսը։ Հարցվածների ևս 14 տոկոսը հնարավոր է համարում քաղաքական պահանջներով ելույթները։ Այս մասին են վկայում «Լևադա-Կենտրոնի» հետազոտության արդյունքները. երկու ցուցանիշներն էլ դարձել են առավելագույնը 2024 թվականի հուլիսից ի վեր։

Եթե համեմատենք նոյեմբերյան չափման հետ, ապա տնտեսական բողոքների հնարավորությանը հավատացողների թիվն աճել է 4 տոկոսային կետով (16 տոկոսից), իսկ քաղաքական բողոքներինը՝ 3 կետով (11 տոկոսից)։ Քաղաքական ակցիաներին անձամբ մասնակցելու պատրաստակամությունն աճել է 1 տոկոսային կետով՝ հասնելով 12 տոկոսի։ Միևնույն ժամանակ, տնտեսական բողոքների պոտենցիալ մասնակիցների բաժինը, հակառակը, կրճատվել է 1 տոկոսային կետով՝ մինչև 16 տոկոս։ Հարցումն անցկացվել է ապրիլի 22-29-ին։

Բողոքի պոտենցիալն ավելի բարձր արձանագրվել էր միայն 2024 թվականի հուլիսին (21 տոկոս՝ կենսամակարդակի անկման հարցում, 15 տոկոս՝ քաղաքական կարգախոսներով)։ Համեմատության համար՝ 2022 թվականի փետրվարին զանգվածային բողոքի ցույցերը հնարավոր էր համարում ռուսաստանցիների 29 տոկոսը, տնտեսական ակցիաներին մասնակցելու պատրաստ էր 23, քաղաքականին՝ 18 տոկոսը։

Բողոքի տրամադրությունների աճը տեղի է ունենում իշխանության վարկանիշի նվազման ֆոնին։ Կրեմլի վերահսկողության տակ գտնվող Հանրային կարծիքի ուսումնասիրման համառուսաստանյան կենտրոնի (ՎՑԻՕՄ) տվյալներով՝ Վլադիմիր Պուտինի վարկանիշը ապրիլին ընկել է մինչև 65,6 տոկոս՝ դառնալով Ուկրաինայում պատերազմի սկզբից ի վեր նվազագույն ցուցանիշը։ «Միասնական Ռուսաստանի» աջակցությունն իջել է 28 տոկոսից ցածր՝ նույնպես թարմացնելով հակառեկորդը 2022 թվականի փետրվարից ի վեր։ ՎՑԻՕՄ-ի բաց հարցման մեջ, որտեղ պատասխանողներն իրենք են նշում, թե ում են վստահում, Պուտինի արդյունքն ընդհանրապես կազմել է 29,5 տոկոս՝ դարձյալ ամենացածր ցուցանիշը լայնածավալ ներխուժման սկզբից ի վեր։ Դրանից հետո Հանրային կարծիքի ֆոնդը և ՎՑԻՕՄ-ը հրաժարվել են հրապարակել նախագահի շաբաթական վարկանիշը։

Տրամադրությունների տեղաշարժը, փորձագետների կարծիքով, բացատրվում է պատճառների ամբողջությամբ։ Լոնդոնի Թագավորական քոլեջի Ռուսաստանի ինստիտուտի տնօրեն Գուլնազ Շարաֆուտդինովան նշել է մեսենջերների և ինտերնետի անջատումները, Ուկրաինայի հարցով ԱՄՆ-ի հետ գործարքի հետ կապված չիրականացած հույսերը և պատերազմից ընդհանուր հոգնածությունը, որն ավելի ու ավելի զգալիորեն է հարվածում տնտեսությանը և կենսամակարդակին։ Սոցիոլոգ, ՌԴ կառավարության նախկին խորհրդական Կոնստանտին Գաազեն հավելել է, որ իշխանություններն ավելի ու ավելի ակտիվ են միջամտում առօրյա կյանքին (բլեքաութներ, սահմանափակումներ), իսկ պատերազմն ավելի ու ավելի խոր է ներթափանցում Ռուսաստան՝ դրոններ, հարվածներ նավթավերամշակման գործարաններին։ «Այս ամենը ժամանակի ընթացքում կուտակվում է», — նշել է նա։

Source: https://news.am/hy/news/1035672