Դիվանագիտական կապեր ունեցող արտասահմանյան և հունգարական մի շարք աղբյուրներ նշել են, որ ԱՄՆ Հանրապետական կուսակցության հետ կապված շրջանակներում քննարկվում է հիպոթետիկ սցենար, որի համաձայն՝ Հունգարիայի նախկին վարչապետ Վիկտոր Օրբանը կարող է զբաղեցնել բարձր պաշտոն ՄԱԿ համակարգում, գրել է Vsquare վերլուծական պորտալը։

Զրուցակիցների խոսքով՝ նման տարբերակի առանցքային տարր է դիտարկվում ոչ թե կոնկրետ պաշտոնը, այլ այն հնարավոր դիվանագիտական կարգավիճակը, որն ուղեկցում է բարձր պաշտոններին ՄԱԿ կառույցներում։ ՄԱԿ 1946 թվականի արտոնությունների և անձեռնմխելիությունների մասին կոնվենցիայի համաձայն՝ գլխավոր քարտուղարը, գլխավոր քարտուղարի տեղակալներն ու օգնականներն օգտվում են ընդլայնված իմունիտետից, այդ թվում՝ դատական հետապնդումից պաշտպանությունից պաշտոնական պարտականությունների շրջանակում կատարած գործողությունների համար ։

Աղբյուրները նշել են, որ տեսականորեն քննարկվող նշանակումները կարող են ենթադրել անձեռնմխելիության տարբեր մակարդակներ՝ բարձրագույն պաշտոններում լիարժեք դիվանագիտական կարգավիճակից մինչև ավելի ցածր պաշտոնների համար սահմանափակ ֆունկցիոնալ անձեռնմխելիություն, որը տարածվում է միայն ծառայողական պարտականությունների շրջանակում կատարված գործողությունների վրա։

Նաև նշվել է, որ նման սցենարի հնարավոր քաղաքական աջակցությունը կարող է գալ ոչ միայն ԱՄՆ-ից, այլև առանձին միջազգային քաղաքական գործիչներից, ներառյալ Արգենտինայի նախագահ Խավիեր Միլեյը։ Այս համատեքստում հիշատակվում է ՄԱԿ նոր գլխավոր քարտուղարի ընտրության նախապատրաստման գործընթացը, որտեղ հնարավոր թեկնածուների թվում նշվում է նաև ԱԷՄԳ ղեկավար Ռաֆայել Գրոսին, որը նույնպես ներկայացնում է Արգենտինան։

Աղբյուրների գնահատմամբ՝ նման սցենարը կարող էր տեղավորվել ավելի լայն դիվանագիտական համատեքստում, ներառյալ ՄԱԿ ղեկավարության հնարավոր փոփոխության շուրջ միջազգային կապերը և Օրբանի դաշնակիցների քաղաքական ակտիվությունը։

Նշվել է նաև, որ նրա հնարավոր այցերը ԱՄՆ և ընտանիքի անդամների Հունգարիայից դուրս գտնվելը դիտարկվում են որպես ավելի լայն քաղաքական դասավորության մաս, սակայն կոնկրետ որոշումների հետ ուղիղ կապը չի հաստատվում։

Միաժամանակ ընդգծվել է, որ խոսքը չստուգված և հիպոթետիկ սցենարի մասին է, որը կարող է տապալվել կամ չանցնել փակ քննարկումների սահմաններից դուրս։

Հունգարական լրատվամիջոցներին տված առանձին մեկնաբանության մեջ Օրբանը հերքել է հնարավոր իրավական սպառնալիքի մասին ենթադրությունները՝ հայտարարելով, որ գործում է բացառապես օրենքի շրջանակում և կատարում է իր պարտավորությունները։

Source: https://news.am/hy/news/1039642