Վենեսուելայի Մարակայբո լճում գտնվող գազավերամշակման գործարանում ուրբաթ օրը տեղի ունեցած խոշոր պայթյունի և հրդեհի հետևանքով տուժել է վեց բանվոր, ինչպես նաև վնաս է հասցվել ձեռնարկությանը։ Այս մասին՝ հղում անելով «PDVSA» պետական նավթային ընկերությանը, հաղորդում է «Reuters» լրատվական գործակալությունը:

Վենեսուելայի հնացած նավթագազային օբյեկտներում, հատկապես արևմտյան տարածաշրջանում, հրդեհներն ու էլեկտրաէներգիայի անջատումները հաճախակի բնույթ են կրում, քանի որ օտարերկրյա ներդրումների տևական բացակայությունը և ԱՄՆ պատժամիջոցները խոչընդոտում են տեխնիկական սպասարկման իրականացմանը:

«PDVSA»-ի հայտարարության մեջ նշվում է, որ առավոտյան տեղի ունեցած պայթյունից հետո ձեռնարկությունում գործարկվել են արտակարգ իրավիճակների արձանագրություններ և իրականացվել է անձնակազմի տարհանում:

Ընկերությունը նաև հաստատել է, որ արձագանքման խմբերն օգնություն են ցուցաբերել ընդհանուր առմամբ վեց տուժած բանվորների։ Տեսանյութում երևում էր, որ հրդեհը մարվել է կեսօրից հետո իրականացված բազմաժամյա աշխատանքներից հետո, ինչի համար պահանջվել է անջատել օբյեկտը սնուցող գազատարները։ Ավելի վաղ «Reuters» գործակալության հրապարակած հաղորդագրություններում և տեսանյութերում երևում էր, որ ջուրը թռած երկու բանվորները ստացել են ծանր այրվածքներ։

Նրանք տեղափոխվել են արևմտյան Մարակայբո քաղաքի մոտակա հիվանդանոց, իսկ մյուս չորսը ստացել են ավելի թեթև վնասվածքներ։ «Reuters»-ը հրապարակել է միջադեպի վերաբերյալ «PDVSA»-ի ներքին զեկույցները, ըստ որոնց, հրդեհը բռնկվել է «Lamargas» կոմպրեսորային կայանում գազի ճնշման նվազեցման գործողության ընթացքում։

Գազի գործարանը ներառված է «Lago Cinco» նախագծում։ Այն ղեկավարում է «China Concord Resources Corp» ընկերությունը՝ լճի ջրերում հում նավթի արդյունահանման նպատակով «PDVSA»-ի հետ երկարաձգված պայմանագրի շրջանակներում։ Զեկույցներից մեկում նշվել է, որ օբյեկտը վնասվել է։

«PDVSA»-ն հայտարարել է, որ տեխնիկական հանձնաժողովը հետաքննություն կանցկացնի պատճառները պարզելու համար, և հավելել է, որ պատահարը չի ազդել Վենեսուելայի արևմուտքում գտնվող նավթագազային գործառնությունների անխափանության վրա։

Վաշինգտոնը 100 միլիարդ դոլար արժողությամբ վերակառուցման հավակնոտ ծրագիր է առաջարկել Վենեսուելայի էներգետիկ ոլորտում։ Դրանք մեկնարկել են հունվարին ԱՄՆ-ի կողմից տապալված նախագահ Նիկոլաս Մադուրոյի ձերբակալությունից հետո։

Այնուամենայնիվ, վերլուծաբանների և հնարավոր ներդրողների կարծիքով՝ «PDVSA»-ի ենթակառուցվածքների՝ էլեկտրակայանների, նավթավայրերի ու նավթավերամշակման գործարանների հաճախակի վթարներն ու ծայրահեղ մաշվածությունը դեռևս կասկածի տակ են դնում ակնկալվող արդյունքների ձեռքբերումը։

Source: https://news.am/hy/news/1035889