Պակիստանի ներքին գործերի նախարար Մոհսին Նաքվին, որը շաբաթ օրը երկօրյա պաշտոնական այցով ժամանել է Իրան՝ տարածաշրջանում երկխոսության խթանման և խաղաղության ամրապնդման նպատակով, իրանցի գործընկերոջ հետ բանակցություններ է վարել երկկողմ կապերի և տարածաշրջանային զարգացումների շուրջ, հայտնել է Tasnim-ը։

Նաքվին շաբաթ օրը ժամանել է Թեհրան՝ Պակիստանի կողմից տարածաշրջանում երկխոսության խթանման և խաղաղության ամրապնդմանն ուղղված շարունակական ջանքերի շրջանակում։ Օդանավակայանում Պակիստանի ներքին գործերի դաշնային նախարարին ջերմորեն դիմավորել է նրա իրանցի գործընկեր Էսքանդար Մո'Մենին։

Ողջույնի արարողությունից հետո երկու երկրների ներքին գործերի նախարարները երկկողմ հանդիպում են անցկացրել, որի ընթացքում մանրամասն քննարկել են իրանա-պակիստանյան հարաբերությունները և խաղաղության բանակցությունների վերսկսման հեռանկարները։

Հանդիպմանը քննարկվել են նաև փոխադարձ հետաքրքրություն ներկայացնող հարցեր, այդ թվում՝ տարածաշրջանում կայուն խաղաղությունը և տարածաշրջանային վերջին զարգացումները։

Իրանի ներքին գործերի նախարարը բարձր է գնահատել Պակիստանի ցամաքային զորքերի շտաբի պետ, ֆելդմարշալ Ասիմ Մունիրի՝ շարունակվող հակամարտության կարգավորման ուղղությամբ գործադրած «անկեղծ և նպատակաուղղված ջանքերը» և Պակիստանի կառուցողական դերը տարածաշրջանային խաղաղության և կայունության խթանման գործում։

Source: https://news.am/hy/news/1035976