2026 թվականի հունվարի սկզբին ԱՄՆ տեղափոխված Նիկոլաս Մադուրոն պահվում է ոչ թե մենախցում, այլ Նյու Յորքի Metropolitan Detention Center-ի քննչական մեկուսարանի 18 հոգանոց ընդհանուր խցում։ Այս մասին Der Spiegel-ի հարցազրույցում հայտնել է նրա որդին՝ Նիկոլաս Մադուրո Գեռան։

Երիտասարդի խոսքով՝ սկզբում հայրը մենակ էր նստած, սակայն Զատկից առաջ նրան տեղափոխել են ընդհանուր խուց։ Բանտում շփման պակաս ավագ Մադուրոն չի զգում․ նրա խցակիցների կեսը խոսում է իսպաներեն։ Բացի այդ, նա ամեն օր տուն զանգահարելու հնարավորություն ունի։ «Այն պահից, երբ նրան տեղափոխեցին, նա ամեն երեկո՝ մոտավորապես ժամը յոթին, զանգում է», — նշել է Մադուրո Գեռան։

Ինչ վերաբերում է ժամանցին, որդին պատմել է, որ հայրը հեռուստացույց է դիտում, անգլերեն է սովորում, շատ է կարդում Աստվածաշունչ, ինչպես նաև Amazon-ի միջոցով ուղարկվող գրքեր՝ Վենեսուելայի Սահմանադրությունը, Սիմոն Բոլիվարի աշխատությունները, մետաֆիզիկայի մասին երկեր, Շեքսպիր և Էսքիլես։ Մադուրոն նաև հետաքրքրվում է այն գրականությամբ, որն ուսումնասիրում է իր 20-ամյա թոռնուհին (նա սովորում է գեղարվեստական ֆակուլտետում)։

Ընտանիքի գլխավոր մտահոգությունը սնունդն է։ «Հայրս միշտ շատ ճիշտ է սնվել՝ շատ բանջարեղեն, քիչ շաքար։ Հիմա նա հիմնականում օգտագործում է ածխաջրեր, վերամշակման ենթարկված մթերքներ, չափազանց շատ աղ», — դժգոհել է Մադուրո Գեռան։ Բացի այդ, ձերբակալության ժամանակ ամերիկացի զինվորները վնասել էին Մադուրոյի ծունկը, սակայն հիմա ցավն արդեն այնքան ուժեղ չէ, պատմել է երիտասարդը։

2026 թվականի հունվարի սկզբին ԱՄՆ-ը Վենեսուելայում իրականացրել է ռազմական գործողություն․ ընդամենը 2 ժամ 20 րոպեում Delta Force հատուկ ստորաբաժանման ուժերը բռնել և Ամերիկա են տեղափոխել Մադուրոյին և նրա կնոջը՝ Սիլիա Ֆլորեսին։ Նրանց մեղադրանք է առաջադրվել «թմրաահաբեկչության», զենքի ապօրինի պահման և թմրանյութերի մաքսանենգության համար։

Source: https://news.am/hy/news/1035564