Ճապոնական ավտոարտադրող հսկա Honda-ն վերջին 70 տարվա ընթացքում առաջին անգամ տարեկան վնաս է կրել, քանի որ էլեկտրական ավտոմեքենաների շուկայում կատարված ներդրումները չեն արդարացվել, հայտնում է BBC News-ը:

Էլեկտրական ավտոմեքենաների պահանջարկն այնքան բարձր չէր, որքան կանխատեսում էր ընկերությունը, և Honda-ն հայտնել է 2026 թվականի մարտին ավարտված տարվա համար 423 միլիարդ իենի (2,68 միլիարդ ԱՄՆ դոլար) ընդհանուր գործառնական վնասի մասին:

Ընկերությունը հայտարարել է, որ հրաժարվում է էլեկտրական ավտոմեքենաների արտադրության իր որոշ ծրագրերից և ծախսերը նվազեցնելու նպատակով պահեստամասեր կներկրի Չինաստանից, որտեղ գներն ավելի ցածր են։

Ընկերությունը վնասների ավելացման պատճառ է նշել ԱՄՆ քաղաքականության փոփոխությունները, դրանց թվում՝ էլեկտրական ավտոմեքենաներ գնող ամերիկացի սպառողների համար հարկային արտոնությունների չեղարկումը և մաքսատուրքերի սահմանումը։

Ամերիկացի սպառողները նախկինում նոր էլեկտրական ավտոմեքենա գնելիս կարող էին ստանալ մինչև 7500 դոլարի հարկային արտոնություն, սակայն 2025 թվականի սեպտեմբերին ԱՄՆ նախագահ Դոնալդ Թրամփը չեղարկեց դա։ 2025-ին ավտոմեքենաների և պահեստամասերի՝ նրա ներմուծած մաքսատուրքերը նույնպես վնաս են հասցրել մի քանի խոշոր ավտոարտադրողների շահույթին՝ չնայած սակագների նվազեցմանը 25%-ից մինչև 15%:

Honda-ն, որի բաժնետոմսերն առաջին անգամ ֆոնդային շուկայում հայտնվել են 1957 թվականին, տարիների ընթացքում աճել և դարձել է Ճապոնիայի երկրորդ խոշորագույն ավտոմոբիլային ընկերությունը։ Վերլուծաբանները նշում են, որ դրա հսկայական չափերը և հնացած կառուցվածքը դժվարացնում են արագ հարմարվելը էլեկտրամոբիլների պահանջարկի կտրուկ անկումներին ու աճին։

Honda-ն հայտարարել է, որ այժմ մտադիր է կենտրոնանալ իր հաջողակ մոտոցիկլետային բիզնեսի, ֆինանսական ծառայությունների և հիբրիդային ավտոմեքենաների արտադրության վրա: Ընկերությունը Հյուսիսային Ամերիկան, Ճապոնիան և Հնդկաստանը անվանել է «իր ապագա աճի առաջնահերթ շուկաներ», թեև կասեցրել է Կանադայում էլեկտրամոբիլների և մարտկոցների արտադրության իր ծրագրերը։

Honda-ի գործադիր տնօրեն Տոսիհիրո Միբեն հայտարարել է, որ ընկերությունը կհրաժարվի իր նպատակից, ըստ որի՝ մինչև 2030 թվականը էլեկտրամոբիլները պետք է կազմեին նոր մեքենաների վաճառքի մեկ հինգերորդը։ Նա հավելել է, որ Honda-ն նաև հրաժարվում է մինչև 2040 թվականը բոլոր մեքենաները էլեկտրական դարձնելու նպատակից։

Honda-ն ակնկալում է, որ էլեկտրամոբիլների հետ կապված վնասները հաջորդ ֆինանսական տարում, որը կավարտվի 2027 թվականի մարտին, կկազմեն 512 միլիարդ իեն:

Source: https://news.am/hy/news/1035506