Թուրքիայի նախագահ Ռեջեփ Թայիփ Էրդողանը երկուշաբթի հայտարարել է, որ Թուրքիայի և Ադրբեջանի համատեղ նախաձեռնության շրջանակում Սիրիա բնական գազի մատակարարումները նպաստում են այդ երկրի զարգացմանը և տարածաշրջանային կայունությանը։

«Անցյալ տարվա օգոստոսին Թուրքիայի և Ադրբեջանի համատեղ նախաձեռնության արդյունքում մեկնարկած Սիրիա գազի մատակարարումների ներդրումն այդ երկրի զարգացման և տարածաշրջանային անվտանգության գործում անհերքելի է»,- ասված է Էրդողանի ուղերձում, որն ընթերցվել է Բաքվի էներգետիկ շաբաթվա բացմանը։

Էրդողանն ընդգծել է, որ տարածաշրջանում վերջին իրադարձությունները ևս մեկ անգամ ի ցույց դրեցին Թուրքիայի և Ադրբեջանի միջև էներգետիկ համագործակցության ռազմավարական կարևորությունը։

Ըստ նրա՝ երկու երկրները հաջողությամբ իրականացրել են մի շարք խոշոր էներգետիկ նախագծեր, որոնք ժամանակին տարածաշրջանի համար անիրագործելի էին համարվում։ Դրանց թվում Էրդողանը նշել է Բաքու-Թբիլիսի-Ջեյհան նավթամուղը, Բաքու-Թբիլիսի-Էրզրում գազամուղը և Տրանսանատոլիական գազամուղը (TANAP), որոնք գործարկվել են Ադրբեջանի հետ համատեղ՝ Վրաստանի աջակցությամբ։ Էրդողանը նշել է, որ փոխգործակցությունը խորացել է «Ազերի-Չիրագ-Գյունեշլի» և «Շահ Դենիզ» էներգետիկ հանքավայրերում գործընկերության շնորհիվ։

Նա հավելել է, որ «Շաֆագ-Ասիման» նախագծի շրջանակում նոր գործընկերությունը վկայում է երկկողմ էներգետիկ համագործակցության շարունակական ընդլայնման մասին։

Էրդողանը նշել է նաև, որ անցյալ տարի շահագործման հանձնված Իգդիր-Նախիջևան գազամուղն ամրապնդել է Ադրբեջանի Նախիջևանի Ինքնավար Հանրապետության էներգամատակարարման անվտանգությունը։

Էրդողանն ընդգծել է, որ Թուրքիայի և Ադրբեջանի էլեկտրական ցանցերի միավորումը պահպանում է իր ռազմավարական կարևորությունը։

Նա առանձնացրել է «կանաչ» էլեկտրաէներգիայի հաղորդման և առևտրի նախագիծը, որին մասնակցում են Թուրքիան, Ադրբեջանը, Վրաստանը և Բուլղարիան՝ նշելով, որ ակնկալվում է, որ այն իր ներդրումը կունենա տարածաշրջանի էներգետիկ անվտանգության գործում՝ լայն իմաստով։

Խոսելով տարածաշրջանային էներգետիկ երթուղիների մասին՝ Էրդողանը հայտարարել է, որ զգալի հնարավորություններ կան թուրքմենական բնական գազը Ադրբեջանի և Թուրքիայի տարածքով միջազգային շուկաներ տեղափոխելու հարցում համագործակցության ընդլայնման համար։ Նա միանշանակ հիշատակել է, որ Բաքու-Թբիլիսի-Ջեյհան խողովակաշարն ավելի ու ավելի հաճախ է օգտագործվում Ղազախստանի էներգետիկ ռեսուրսները արևմտյան շուկաներ տեղափոխելու համար։

Source: https://news.am/hy/news/1040091