Վերջին շաբաթներին Բալթյան երկրները դիմել են ուկրաինացի պաշտպանական արտադրանքի արտադրողներին և քաղաքացիական պաշտպանության փորձագետներին՝ ռմբապաստարանների կառուցումը քննարկելու համար, գրում է Politico-ն՝ հղում անելով Ուկրաինական զինագործների խորհրդի տնօրեն Իգոր Ֆեդիրկոյին։

«Սրանք փոքր երկրներ են։ Նրանք փորձում են գտնել լավագույն լուծումները ռուսական ագրեսիայի դեպքում, եթե այն տեղի ունենա։ Որպեսզի ապահովեն իրենց մարդկանց անվտանգությունը», — ասել է Ֆեդիրկոն։

Էստոնիայի պաշտպանության նախարար Հաննո Պևկուրը Politico-ին հայտնել է, որ իր երկիրը վաղուց է պատրաստվում Ռուսաստանի կողմից հնարավոր հարձակումներին և ունի բավարար փորձագիտություն բնակչությանը պաշտպանելու համար։ Լիտվայի ԱԳՆ ներկայացուցիչը հայտնել է, որ գերատեսչությունը տեղեկություն չունի ռմբապաստարանների վերաբերյալ բանակցությունների մասին, սակայն նշել է, որ «Ուկրաինայում ձեռք բերված փորձը հսկայական արժեք է ներկայացնում»։ Լատվիայի ԱԳ նախարարն էլ մեկնաբանության հարցմանը չի պատասխանել։

Ուկրաինական «Մետինվեստ» արտադրողի գլխավոր տնօրեն Յուրի Ռիժենկովը հաստատել է, որ իր ընկերությունը նախնական բանակցություններ է անցկացրել Բալթյան երկրների կառավարությունների հետ՝ հնարավոր անօդաչու թռչող սարքերի հարձակումներից պաշտպանվելու համար ապաստարանների կառուցման վերաբերյալ։ «Ռմբապաստարան կարող է կառուցել ցանկացածը, սակայն արժեքավոր է հենց տակտիկական փորձը», — հավելել է Ռիժենկովը։

Վերջին մի քանի ամիսներին Բալթյան երկրների օդային տարածք անօդաչու թռչող սարքերի ներխուժման դեպքերն ավելի հաճախակի են դարձել։ Լատվիայում ընկած ուկրաինական դրոններից մեկը վնասել է նավթային պահեստարանը Ռուսաստանի սահմանի մոտ գտնվող Ռեզեկնե քաղաքում։ Դրոնների հետ կապված մի շարք միջադեպեր հանգեցրել են երկրի պաշտպանության նախարարության ղեկավարի հրաժարականին, որը չկարողացավ դիմակայել սպառնալիքին, իսկ հետո նաև կառավարության հրաժարականին։ Լիտվայում օդային տագնապի պատճառով կառավարության անդամները և երկրի նախագահ Գիտանաս Նաուսեդան ստիպված են եղել ապաստանել ապաստարանում։ Անօդաչու թռչող սարքերի ներխուժման նման մի քանի միջադեպերից հետո Ուկրաինայի ԱԳ նախարար Անդրեյ Սիբիգան ներողություն է խնդրել Բալթյան երկրներից։

Source: https://news.am/hy/news/1038482