2023 թվականին Հայաստանը պարտություն կրեց հարևան Ադրբեջանի դեմ պատերազմում։ Այդ ժամանակվանից Հայաստանի վարչապետ Նիկոլ Փաշինյանը, հիասթափվելով Ռուսաստանից՝ Հայաստանի երկարամյա հովանավորից, փորձում է շրջվել դեպի Ամերիկա և Եվրոպա և աշխատում է Ադրբեջանի հետ խաղաղության պայմանագրի ուղղությամբ։

Շատ հայեր չեն սիրում Փաշինյանին։ Երևանի պատերը ծածկված են զոհված զինվորների պատկերներով, որոնք հիշեցնում են պատերազմի ընթացքում նրա ձախողումների մասին, գրել է The Economist-ը։

Պարբերականը հիշեցրել է, որ մայիսի 4–5-ին Հայաստանում անցկացվել է Եվրոպական քաղաքական համայնքի գագաթաժողովը, որի ընթացքում դրսում բողոքող ցուցարարները ծածանում էին Արցախի դրոշները։ Տարածաշրջանից որոշ փախստականներ ցանկանում էին, որ իրենց հարազատների մարմինները տեղափոխվեն Հայաստան, մյուսները կոչ էին անում Ադրբեջանին ազատ արձակել ռազմագերիներին։ Բողոքողների մի մասը կարծում է, որ արևմտամետ շրջադարձը կհանգեցնի հակառակ արդյունքի։

«Այն Հայաստանը վերածում է աշխարհաքաղաքական խաղերի ասպարեզի», — ասել է ցուցարարներից մեկը պարբերականի հարցազրույցում։

Դժգոհություն են հայտնում նաև ազգայնական քաղաքական գործիչները։ Ռուս-հայ օլիգարխ Սամվել Կարապետյանը, որը գլխավորում է ամենահայտնի ընդդիմադիր խումբը, գտնվում է տնային կալանքի տակ՝ իշխանությունը տապալելու կոչերի համար (նա հերքում է մեղադրանքները)։ Կարապետյանը կառավարությանը մեղադրել է Ադրբեջանի պահանջներին զիջելու մեջ։ Նրա խոսքով՝ Փաշինյանը «փորձում է պատերազմ սադրել» Ռուսաստանի հետ։ Այսպիսի տեսակետները Երևանում հազվադեպ չեն, սակայն ավելի քիչ են հանդիպում գյուղական վայրերում, որտեղ կառավարությունը կառուցել է ճանապարհներ և դպրոցներ։

Պարբերականն ընդգծել է, որ Փաշինյանն ունի թերություններ։ Նրա պայքարը կոռուպցիայի դեմ թուլացել է, իսկ պոպուլիստական ոճը նյարդայնացնում է նրա ընդդիմախոսներին։

«Փաշինյանից մենք ավելի շատ մենախոսություն ենք ստանում, քան երկխոսություն», — կարծում է Carnegie Europe կենտրոնի վերլուծաբան Թոմաս դե Վաալը։

Կրեմլը ևս կարող է միջամտել։ Ռուսաստանը մատակարարում է Հայաստանի գազի 85 տոկոսը և երկրում ունի ռազմական բազա։ Ռուսական ընկերություններին է պատկանում կենսական նշանակության ենթակառուցվածքը, ինչը դարձել է Հայաստանի նախկին իշխանությունների կողմից կնքված պարտքերի մեղմացման համաձայնագրերի ժառանգությունը։ Վերջերս Ռուսաստանը կասկածելի սանիտարական պատճառներով արգելել է «Ջերմուկի» որոշ խմբաքանակների վաճառքը։ Նման մարտավարությունը, հավանաբար, միայն կուժեղացնի հայերի անվստահությունն իրենց նախկին հովանավորի նկատմամբ։

Source: https://news.am/hy/news/1035684