ԱՄՆ ֆինանսների նախարար Սքոթ Բեսենթը X սոցցանցում հայտարարել է Իրանի վրա տնտեսական ճնշման կտրուկ ուժեղացման մասին՝ ընդգծելով, որ Վաշինգտոնը մտադիր է շարունակել կոշտ պատժամիջոցային արշավը մինչև Թեհրանի հետ բանակցություններում «գոհացուցիչ արդյունք» ստանալը։

Ըստ Բեսենթի՝ ԱՄՆ-ը շարունակում է «Տնտեսական ցասում» (Economic Fury) գործողությունը։

Ամերիկյան ֆինանսների նախարարության ղեկավարը պնդում է, որ ճնշման հետևանքներն արդեն զգացվում են երկրի ներսում։

«Իրանի տնտեսությունը և արժույթը ազատ անկման մեջ են»,- հայտարարել է նա։

Բեսենթը հայտնել է նաև, որ Վաշինգտոնի գնահատմամբ՝ իրանական զինվորականները բախվում են վճարումների հետ կապված խնդիրների, ոստիկանների մի մասը աշխատանքի չի ներկայանում, իսկ Խարգ կղզին՝ Պարսից ծոցում Իրանի նավթային արտահանման առանցքային կենտրոնը, փաստացի դադարեցրել է աշխատանքը։

The @USTreasury continues our Economic Fury campaign against the Iranian regime.Their troops are not getting paid, the police are not reporting for work, and Kharg Island is shut down. The Iranian economy and currency are in free fall.Iran’s Persian Gulf Strait Authority…— Treasury Secretary Scott Bessent (@SecScottBessent) May 28, 2026

The @USTreasury continues our Economic Fury campaign against the Iranian regime.Their troops are not getting paid, the police are not reporting for work, and Kharg Island is shut down. The Iranian economy and currency are in free fall.Iran’s Persian Gulf Strait Authority…

Բացի դրանից, ԱՄՆ ֆինանսների նախարարությունը պատժամիջոցներ է սահմանել Persian Gulf Strait Authority (PGSA) կոչվող կառույցի դեմ։ Վաշինգտոնը պետական և առևտրային կազմակերպություններին նախազգուշացրել է իրանական ծովային երթուղիներով անցման համար վճարումներ կատարելու անթույլատրելիության մասին, ներառյալ՝ նման վճարումները մարդասիրական օգնության քողի տակ թաքցնելու փորձերը։

ԱՄՆ ֆինանսների նախարարը հայտարարել է նաև, որ ամերիկյան ռազմածովային շրջափակումը հանգեցրել է ծովային փոխադրումներում գտնվող իրանական նավթի ծավալների ռեկորդային կրճատման։ Բացի դրանից, ԱՄՆ-ը մտադիր է սահմանափակել իրանական ավիաընկերությունների գործունեությունը, ներառյալ՝ վայրէջքային սլոթերի հասանելիությունը, ինքնաթիռների լիցքավորումը և տոմսերի վաճառքը։

Եզրափակելով՝ Բեսենթն ընդգծել է, որ միայն բանակցությունների հաջող ելքը կարող է կանգնեցնել ճնշման հետագա ուժեղացումը։

«Միայն բանակցությունների գոհացուցիչ արդյունքը վերջ կդնի վայրընթաց պարույրին»,- հայտարարել է նախարարը։

Source: https://news.am/hy/news/1039176