Ամերիկյան զինվորականները հայտարարություն են հրապարակել X սոցիալական ցանցում, որտեղ հայտնել են, թե «հաջողությամբ որսացել են իրանական երկու բալիստիկ հրթիռներ, որոնք թիրախավորել էին Քուվեյթում տեղակայված ամերիկյան զորքերը»։

ԱՄՆ Կենտրոնական հրամանատարության (CENTCOM) տվյալներով՝ որսումը տեղի է ունեցել կիրակի երեկոյան, արևելյան ժամանակով (ET) 23:00-ին։

Սոցցանցի հայտարարության մեջ նշվում է, որ հրթիռները «անմիջապես ոչնչացվել են», ամերիկյան զինծառայողներից ոչ ոք չի տուժել։

«ԱՄՆ Կենտրոնական հրամանատարությունը պահպանում է զգոնությունը և կշարունակի պաշտպանել մեր ուժերը իրանական ագրեսիայից՝ միևնույն ժամանակ աջակցելով գործող կրակի դադարեցման ռեժիմին»,- հավելել են գերատեսչությունում։

Որսումը տեղի է ունեցել հանգստյան օրերին Իրանի և ԱՄՆ-ի միջև վերսկսված փոխադարձ ռազմական գործողությունների ֆոնին։ Կիրակի օրը CENTCOM-ը հայտնել էր, որ հանգստյան օրերի ընթացքում ինքնապաշտպանության կարգով «հարվածներ է հասցրել Գորուկում և Քեշմ կղզում տեղակայված իրանական ռադարներին և անօդաչու սարքերի կառավարման կետերին»։

Source: https://news.am/hy/news/1040041