Հայաստանի խնդիրները լուծելու համար անհրաժեշտ է տնտեսագետ ղեկավար։ Այս մասին այսօր՝ մայիսի 16-ին, Երևանի Նոր Նորք համայնքում կայացած հանրահավաքի ժամանակ հայտարարել է «Ուժեղ Հայաստան» կուսակցությունների դաշինքի պատգամավորության թեկնածուների համամասնական ցուցակը գլխավորող Նարեկ Կարապետյանը։

Նրա խոսքով՝ Հայաստանը 30 տարվա ընթացքում այդպես էլ չի կարողացել լուծել արժանապատիվ աշխատավարձով աշխատատեղերի ապահովման խնդիրը։ «Այս հարցը չի հաջողվել լուծել ոչ 1995-ին, ոչ 1998-ին, ոչ 2008-ին, ոչ 2015-ին, ոչ 2018-ին․ մեր երկիրը կարծես մնում է նույն դասարանում, մենք հարկադրված խոսում ենք արժանապատիվ աշխատատեղերի ստեղծման անհրաժեշտության մասին, քանի որ այս խնդիրը դեռևս արդիական է»,- հայտարարել է Կարապետյանը։

Նա կոչ է արել ընտրողներին հնարավորություն տալ երկրին «անցնել հաջորդ դասարան», օգնել ընտրել նոր ղեկավար, որպեսզի պետության ղեկին լինի մարդ, ով իսկապես կարող է լուծել երկրի հիմնական խնդիրները։ Նա ընդգծել է, որ այս խնդիրը լուծելու համար երկրին անհրաժեշտ է տնտեսագետ ղեկավար, և այսօր Սամվել Կարապետյանը, որը երբեք կյանքում ներգրավված չի եղել քաղաքականության մեջ, պատրաստակամություն է հայտնել զբաղվել իր երկրի զարգացմամբ։

Կարապետյանը նշել է, որ Սամվել Կարապետյանը գործի մարդ է, քիչ է խոսում և նախընտրում է գործել։

Կարապետյանը նաև ուշադրություն է հրավիրել այն հանգամանքի վրա, որ գործող իշխանությունները ջանքեր չեն գործադրում նույնիսկ փոքր խնդիրները լուծելու համար։ «Մինչ այստեղ էինք գալիս, ուշադրություն դարձրի աղբամաններին, ես դրանք հիշում եմ դեռ մանկությունից։ Այսինքն՝ փոփոխություններ չկան։ Թեև դրա համար շատ քիչ ջանք էր պետք»,- նկատել է ընդդիմադիր գործիչը։

Նա վստահություն է հայտնել ընտրություններում «Ուժեղ Հայաստանի» հաղթանակի նկատմամբ։

«Ամեն ինչ կստացվի, եթե միասին պայքարենք։ Չի կարող չստացվել, մենք պայքարելու ենք»,- հավաստիացրել է Կարապետյանը։

Այս բոլոր տարիներին ընտրություններին մասնակցել են քաղաքական գործիչներ, որոնք խոստումներ են տվել, բայց չեն պահել իրենց խոսքը, իսկ հիմա եկել է մի մարդ՝ տնտեսագետ, որը գիտի, թե ինչպես լուծել խնդիրները։

«Եկեք բաց չթողնենք այս հնարավորությունը, որպեսզի հետո չբողոքենք»,- եզրափակել է Կարապետյանը։

Source: https://news.am/hy/news/1035960