ԱՄՆ նախագահության տարիներին Բարաք Օբամայի ունեցած պաշտոնական Instagram-յան էջը կոտրվել է։ Այս մասին հայտնել է TMZ պորտալը։

Լրատվամիջոցի տեղեկություններով՝ կիրակի օրը նախկին նախագահի էջում «տարօրինակ բովանդակություն է հայտնվել», և հետագայում պարզվել է, որ «դա հաքերի ձեռքի գործն է»։ Պարբերականի տվյալներով՝ հաքերը Օբամայի անունից էջում մի քանի հրապարակում է արել, այդ թվում՝ արհեստական բանականությամբ ստեղծված մի պատկեր, որի կից գրությունը թարգմանաբար իբրև թե նշանակում է՝ «Սպիտակ տունը գտնվում է շիաների վերահսկողության տակ»։

Նշվում է, որ Meta ընկերության ներկայացուցիչը հաստատել է կոտրման փաստը և հայտնել, որ էջի նկատմամբ վերահսկողությունն արդեն վերականգնվել է։

Բարաք Օբամայի վերջին պաշտոնական հրապարակումն այս էջում արվել էր նրա նախագահության վերջին օրը՝ 2017 թվականի հունվարի 20-ին։ Հաքերի ինքնությունը դեռևս չի պարզվել, հստակեցնում է պորտալը։

Source: https://news.am/hy/news/1039901