Իսրայելը հինգշաբթի հայտարարել է, որ արտաքսել է բոլոր օտարերկրյա ակտիվիստներին, որոնց կալանել էին իսրայելական զորքերը Գազա ուղևորվող նավատորմի նավերի վրա՝ կալանքի տակ գտնվելու ընթացքում նրանց նկատմամբ ցուցաբերված վերաբերմունքի պատճառով բարձրացած համաշխարհային բողոքի ալիքից հետո, հայտնում է Ֆրանսպրես գործակալությունը:

Իսրայելի ԱԳՆ պաշտոնական ներկայացուցիչ Օրեն Մարմորշտեյնը հինգշաբթի հայտարարել է, որ «PR նավատորմի բոլոր օտարերկրյա ակտիվիստները արտաքսվել են Իսրայելից»։

«Իսրայելը թույլ չի տա Գազայի հատվածի օրինական ծովային շրջափակման որևէ խախտում»,- հավելել է նա։

Ակտիվիստների շահերը ներկայացնող իրավաբանական կենտրոնը հինգշաբթի ավելի վաղ հայտնել էր, որ նավատորմի անդամների մեծ մասը Իսրայելի հարավում գտնվող Ռամոն օդանավակայանից արտաքսման ճանապարհին է։

Կազմակերպությունն իր հայտարարության մեջ հավելել է, որ ակտիվիստները պահվում էին Նեգև անապատում՝ Գազայի մոտակայքի իսրայելական «Կցիոտ» բանտում:

Թուրքիան, իր հերթին, հայտնել է, որ ինքնաթիռներ է ուղարկում Իսրայել՝ «մեր քաղաքացիներին և երրորդ երկրների մասնակիցներին Թուրքիա հասցնելու համար հատուկ չարտերային չվերթներով, որոնք կազմակերպում ենք այսօր»։ Արտաքին գործերի նախարարության աղբյուրները հայտնել են, որ դեպի Ռամոն օդանավակայան է ուղևորվել ավելի քան 400 ուղևորի տարողությամբ երեք չվերթ։ Հաղորդվում էր, որ Եգիպտոսի ակտիվիստները տեղափոխվել են Եգիպտոսի և Իսրայելի սահմանամերձ Տաբա քաղաք, իսկ Հորդանանի ակտիվիստները տեղափոխվել են Ակաբա:

Աշխարհի տարբեր երկրների ավելի քան 430 ակտիվիստ կալանավորվել էր Իսրայելում այն բանից հետո, երբ երկուշաբթի նրանց նավերը կանգնեցվել էին ծովում՝ պաղեստինյան տարածքի շրջափակումը ճեղքելու հերթական փորձի ժամանակ։ Իսրայելի ծայրահեղ աջակողմյան ազգային անվտանգության նախարար Իտամար Բեն-Գվիրը չորեքշաբթի դատապարտման և բացասական արձագանքի ալիք բարձրացրեց աշխարհի տարբեր երկրներում՝ հրապարակելով մի տեսանյութ, որտեղ պատկերված են ձեռքերը կապված և գետնին պառկած ձերբակալված ակտիվիստները:

Source: https://news.am/hy/news/1037314