ՄԱԿ-ի գլխավոր քարտուղար Անտոնիու Գուտերեշի մամուլի քարտուղարի տեղակալ Ֆարհան Հաքը հայտարարել է, որ հինգշաբթի իսրայելցի զինվորականները երկու անգամ խոչընդոտել են Հարավային Լիբանանում ՄԱԿ-ի ժամանակավոր ուժերի (UNIFIL) կազմի խաղաղապահներին, հաղորդում է Al Jazeera-ն:

Մի դեպքում, լիբանանյան Ալ-Բայադա քաղաքից դեպի հարավ, «տանկը կանգնեցրել է լիբանանյան Կարմիր խաչին ուղեկցող խաղաղապահներին, իր հիմնական հրանոթն ուղղել շարասյան վրա և հրամայել նրանց լքել տարածքը»,- լրագրողներին հայտնել է Հաքը: Ավելի ուշ շարասյունը կարողացել է շարունակել ճանապարհը։

Ըստ Հաքի՝ երկրորդ միջադեպի ժամանակ իսրայելական տանկը Նակուրայի մոտակայքում «կարճ ժամանակով» փակել է UNIFIL-ի պարեկախմբի ճանապարհը:

«Նման սահմանափակումները անհամատեղելի են UNIFIL-ի տեղաշարժի ազատությունը հարգելու պարտավորության հետ։ Մենք բոլոր կողմերին կոչ ենք անում լիովին հարգել այդ պարտավորությունը»,- ասել է նա։

Հաքը լրագրողներին հայտնել է նաև, որ հինգշաբթի իսրայելցի զինվորականների արձակած երեք արկեր պայթել են լիբանանա-իսրայելական սահմանի մոտ գտնվող Ռմեյշ գյուղի մոտակայքում՝ UNIFIL-ի դիրքից մոտ 70 մետր հեռավորության վրա։

Միաժամանակ, այսօր ավելի վաղ UNIFIL-ը հայտնել էր նաև Ալ-Բայադայում «ՄԱԿ-ի դիրքի ներսում մեկ հարվածի և ևս մեկի՝ դիրքի մոտակայքում հարված հասցնելու մասին, ինչը հանգեցրել է շենքերի նյութական վնասների»,- ասել է Հաքը։

Source: https://news.am/hy/news/1035799