Իշխանությունները կարծում էին, թե կհայտարարեն իմ դեմ պլանավորվող գործողությունների մասին, և ես կփախչեմ Հայաստանից, ինչից հետո ինձ կմեղադրեն տարբեր մեղքերի մեջ։ Այս մասին մայիսի 21-ին լրագրողների հետ հանդիպման ժամանակ հայտարարել է «Բարգավաճ Հայաստան» կուսակցության պատգամավորության թեկնածուների ցուցակի երկրորդ համարը զբաղեցնող Անդրանիկ Թևանյանը։

Նրա խոսքով՝ իշխանություններն ուզում էին, որ ինքը գործի իրենց սցենարով։ «Կարելի է հարց ուղղել այն մարմիններին, որոնց հանձնարարված էր գործ կարել իմ դեմ. ո՞ւր է հապաղումը։ Ես Նիկոլ Փաշինյանը չեմ, որ մարդկանց գցեմ կրակի մեջ, իսկ հետո թռնեմ դեպքի վայրից, դառնամ մարդկանց մահվան պատճառ, իսկ հետո թռնեմ դեպքի վայրից»,- նշել է ընդդիմադիր գործիչը։

Նա կրկին մեղադրել է Նիկոլ Փաշինյանին պետական դավաճանության մեջ՝ հայտարարելով, որ վերջինս, իր ձևակերպմամբ, դատվելու է։ Թևանյանը նկատել է, որ երբեք չի թաքցրել, որ հայ-ռուսական հարաբերությունների զարգացման կողմնակիցն է՝ ի տարբերություն իշխանությունների, որոնք երկիրը տանում են Հայաստանի թրքացման ճանապարհով։

Ըստ նրա՝ վարչապետի աշխատակազմը տարեկան բյուջեից ստանում է 60-65 միլիոն դոլար, իսկ 8 տարվա ընթացքում՝ մոտ կես միլիարդ դոլար։ «Այդ գումարի կեսը ծախսվել է գաղտնի։ Այս և շատ այլ հարցեր պետք է պարզվեն»,- եզրափակել է Անդրանիկ Թևանյանը։

Source: https://news.am/hy/news/1037263