Իրանի պաշտպանության նախարարության և զինված ուժերի լոգիստիկայի ներկայացուցիչ, բրիգադի գեներալ Ռեզա Թալայի-Նիկը հայտնել է, որ շուտով գերատեսչության ենթակայությամբ կստեղծվի անօդաչու թռչող սարքերի աջակցության կենտրոն, տեղեկացնում է Mehr-ը։

Ըստ նրա, որոշումը կապված է կառավարության կողմից վերջերս քաղաքացիական դրոնների մասին օրենքի մանրամասների և դրա կիրարկման մեխանիզմների հաստատման հետ։

Նա ընդգծել է, որ այսօր անօդաչուները ակտիվորեն օգտագործվում են ինչպես ռազմական, այնպես էլ քաղաքացիական ոլորտներում։

Թալայի-Նիկը նաև հայտարարել է, որ ԱՄՆ-ի և Իսրայելի մասնակցությամբ վերջին սրման ընթացքում անօդաչուներ են կիրառվել Իրանի դեմ, սակայն Իրանի հակաօդային պաշտպանության համակարգը, իբր, կարողացել է ոչնչացնել զգալի թվով ժամանակակից դրոններ։

Նա նշել է, որ երկիրը բախվել է քաղաքացիական անօդաչուների իրավական կարգավորման անհրաժեշտությանը, քանի որ դրանց օգտագործումը առանց վերահսկողության կարող է սպառնալիք ներկայացնել անվտանգության համար և վնաս հասցնել մարդկանց ու ենթակառուցվածքներին։ Ըստ նրա, նախկինում օրենսդրության մեջ առկա էր բաց, որը այժմ վերացվել է խորհրդարանի և կառավարության կողմից նոր օրենքի ընդունման շնորհիվ։

ՊՆ ներկայացուցիչը հայտարարել է, որ սրման շրջանում որոշ քաղաքացիական դրոններ, ըստ իշխանությունների պնդման, օգտագործվել են երկրի անվտանգությանը վնաս հասցնելու նպատակով, իսկ նման գործողությունների համար քրեական պատասխանատվության սահմանումը նվազեցրել է նման դեպքերի թիվը։

Առանձին նա նշել է քաղաքացիական անօդաչուների կիրառման լայն շրջանակը՝ քարտեզագրությունից և գեոդեզիայից մինչև գյուղատնտեսություն, շրջակա միջավայրի մոնիթորինգ և փրկարարական գործողություններ դժվարամատչելի շրջաններում։

Հաղորդվում է նաև, որ դեռևս վերջին իրադարձություններից առաջ նախարարությունը անօդաչուների առաջին խմբաքանակը փոխանցել էր Իրանի Կարմիր Մահիկի տնօրինությանը։ Հեռանկարում կառավարությունը նախատեսում է աջակցել դրոնների արտահանմանը՝ ներառյալ արտոնություններ, հարկային խթաններ և ֆինանսական ծրագրեր տեխնոլոգիական ընկերությունների համար։

Source: https://news.am/hy/news/1039732