Եվրոպայում ռեկորդային շոգ է մոլեգնում

Ֆրանսիայի ավելի քան 20 քաղաքներում գրանցվել են մայիսյան ամենաբարձր ջերմաստիճանները դիտարկումների ամբողջ պատմության ընթացքում, իսկ Մեծ Բրիտանիայում սահմանվել է մայիս ամսվա ազգային ջերմաստիճանային ռեկորդ՝ Եվրոպայի զգալի մասն ընդգրկած վաղամառային ծայրահեղ շոգի ֆոնին։

Բրիտանական Met Office օդերևութաբանական ծառայության տվյալներով՝ ռեկորդը գերազանցվել է այն բանից հետո, երբ Լոնդոնի մերձակայքում գտնվող Հիթրոու օդանավակայանում ջերմաստիճանը հասել է 33,5°C-ի։ Երկուշաբթի և երեքշաբթի օրերի ընթացքում սպասվում են մինչև 35°C ցուցանիշներ։ Օդերևութաբանները նախազգուշացնում են, որ Իսպանիայում մինչև շաբաթվա վերջ ջերմաստիճանը կարող է բարձրանալ մինչև 40°C։

Ֆրանսիայի Météo France օդերևութաբանական ծառայությունը տեղի ունեցողը նկարագրել է որպես շոգի «վաղաժամ, բացառիկ և տևական» ժամանակաշրջան։ Ըստ կանխատեսումների՝ այն կտևի ևս մի քանի օր։ Որպես պատճառ նշվում է այսպես կոչված «ջերմային գմբեթը»՝ մթնոլորտային երևույթ, որի դեպքում Մարոկկոյից եկող տաք օդը հայտնվում է բարձր ճնշման գոտու տակ «արգելափակված» վիճակում։

Փորձագետները նախազգուշացնում են, որ նման երևույթները կլիմայի փոփոխության պատճառով Եվրոպայում ավելի հաճախակի և ինտենսիվ կդառնան։ Կլիմայագետների գնահատականներով՝ հունիսյան շոգի ալիքները Եվրոպայում այժմ մոտ 10 անգամ ավելի հավանական են, քան նախաարդյունաբերական մակարդակում։ Նմանատիպ միտում սկսում է դրսևորվել նաև մայիսին։

Ֆրանսիայում 31 դեպարտամենտ տեղափոխվել է ջերմաստիճանային բարձր վտանգի ռեժիմի, ներառյալ տագնապի նարնջագույն մակարդակով ութ տարածաշրջան։ Օդերևութաբանական ծառայությունը 2004 թվականին նախազգուշացումների համակարգի ներդրումից ի վեր առաջին անգամ ակտիվացրել է այն մայիս ամսվա համար։

Ջերմաստիճանը տեղ-տեղ հասել է 36°C-ի։ Փարիզում գրանցվել է 32,6°C, Բորդոյում՝ 34,2°C, իսկ Բրիվ-լա-Գայարդ քաղաքում՝ 35,3°C, ինչը գրեթե 2°C-ով բարձր է մայիսյան նախորդ ռեկորդից։

Փարիզի արվարձանում 10 կիլոմետրանոց վազքարշավի ժամանակ մեկ մարդ մահացել է սրտի կաթվածից, ևս տասը մասնակից հոսպիտալացվել է ծայրահեղ ծանր վիճակում։

Իսպանիայում շոգը նույնպես ուժեղանում է։ Հանգստյան օրերին որոշ հարավային շրջաններում ջերմաստիճանը հասել է 38°C-ի՝ նորմայից 5–10°C-ով բարձր։ Օդերևութաբանները կանխատեսում են շոգի հետագա ուժեղացում մինչև շաբաթվա վերջ՝ հնարավոր 36–38°C առավելագույն ցուցանիշներով Գվադիանայի, Գվադալկվիվիրի և Էբրոյի հովիտներում, իսկ տեղ-տեղ՝ մինչև 40°C։ Սպասվում են նաև այսպես կոչված «արևադարձային գիշերներ», երբ գիշերը ջերմաստիճանը չի իջնում 20°C-ից։

Մեծ Բրիտանիայի առանձին շրջաններում երեք օր անընդմեջ ջերմաստիճանը կարող է պահպանվել 26–28°C-ից բարձր, ինչն, ըստ էության, կարող է շոգի ալիք համարվել։ Օդերևութաբանները նշում են, որ ներկայիս իրավիճակը Եվրոպայում վերջին տարիների ընթացքում շոգի ամենավաղ և ինտենսիվ դրվագներից մեկն է։

Source: https://news.am/hy/news/1038267