Սարաևոյում գրանցված և ԱՄՆ նախագահ Դոնալդ Թրամփի շրջապատի հետ կապեր ունեցող AAFS Infrastructure and Energy ընկերությունը կարող է Բալկաններով անցնող, ավելի քան 1 միլիարդ դոլար արժողությամբ գազատարի կառուցման և շահագործման կոնցեսիա ստանալ։ Նախագիծը պետք է ապահովի ամերիկյան հեղուկացված բնական գազի մատակարարումները տարածաշրջան և փոխարինի ռուսական գազի մատակարարումների մի մասին։

Ինչպես հայտնել է The Guardian-ը, AAFS-ը գործնականում նման մասշտաբի ենթակառուցվածքային նախագծերի իրականացման փորձ գրեթե չունի։ Սակայն նրա ներկայացուցիչների թվում կան անձինք, որոնք սերտորեն կապված են MAGA շարժման և Թրամփի քաղաքական շրջապատի հետ։

Ընկերության առանցքային ներկայացուցիչներից մեկն ամերիկացի իրավաբան Ջեսի Բինալն է, որը հայտնի է Թրամփի և նրա դաշնակիցների իրավական պաշտպանության գործին իր մասնակցությամբ։ 2020 թվականի ընտրություններից հետո նա ակտիվորեն աջակցում էր քվեարկության ընթացքում խախտումների մասին հայտարարություններին և մասնակցում էր Ջո Բայդենի հաղթանակը վիճարկելու փորձերի հետ կապված դատական գործընթացներին։

Ընկերության մեկ այլ ներկայացուցիչը Ջո Ֆլինն է՝ Թրամփի ազգային անվտանգության հարցերով նախկին խորհրդական Մայքլ Ֆլինի եղբայրը։ Թերթի տվյալներով՝ երկուսն էլ կապված են 2020 թվականի նախագահական ընտրությունների արդյունքները վիճարկելու արշավի հետ։

Գազատարը դիտարկվում է որպես Բոսնիա և Հերցեգովինայի պատմության մեջ ամենախոշոր էներգետիկ նախագծերից մեկը։ Թերթի աղբյուրների խոսքով՝ բոսնիացի պաշտոնյաների շրջանում ԱՄՆ վարչակազմի ներկայացուցիչները երկրի ղեկավարությանը հասկացրել են, որ Վաշինգտոնը շահագրգռված է, որպեսզի նախագիծը հաստատվի հենց AAFS-ի համար։

The Guardian-ի հետաքննությունը նշել է, որ իրավիճակը հարցեր է առաջացնում ԱՄՆ պետական շահերի, էներգետիկ քաղաքականության և ներկայիս ամերիկյան վարչակազմի հետ կապված անձանց առևտրային շահերի հնարավոր հատման վերաբերյալ։

Թերթի տվյալներով՝ նախագիծն ունի ոչ միայն տնտեսական, այլև աշխարհաքաղաքական նշանակություն։ Այն Բալկաններում էներգետիկ ազդեցության համար ավելի լայն պայքարի մաս է, որտեղ ԱՄՆ-ը ձգտում է նվազեցնել տարածաշրջանի կախվածությունը ռուսական էներգակիրներից։

Միևնույն ժամանակ, փորձագետները զգուշացնում են, որ նախագծի շուրջ արտաքին ճնշման ուժեղացումը կարող է ազդել Բոսնիա և Հերցեգովինայում փխրուն քաղաքական հավասարակշռության վրա, որը պահպանվում է 1992–1995 թվականների պատերազմի ավարտից և Դեյթոնի համաձայնագրերի ստորագրումից ի վեր։

Source: https://news.am/hy/news/1039697