Հայաստանի երկրորդ նախագահ, վարչապետի թեկնածու Ռոբերտ Քոչարյանը մեկնաբանել է Նիկոլ Փաշինյանի հայտարարությունը, որով վերջինս ուղղակիորեն պահանջել էր Քոչարյանի կալանավորումը։

«Այսօր հայտարարել է, թե ես պետք է բանտում նստեմ։ Լեռնային Ղարաբաղն ունեցել է 4 նախագահ։ Երեքը Բաքվի բանտում են։ Երևի «հեռակառավարման վահանակով» (Բաքվից – խմբ.) ասել են՝ չորրորդն էլ (երևանյան – խմբ.) բանտում լինի»,- նկատել է քաղաքական գործիչը։

«Թույլ չենք տա», – բացականչել են դահլիճից։

Մեկնաբանելով Արցախ վերադառնալու հարցը՝ քաղաքական գործիչը փաստել է դրա բարդությունն ու ցավոտ լինելը։ «Վերադարձի իրավունքն անօտարելի իրավունք է, խոսքը պատերազմի մասին չէ, սակայն իշխանությունները չեն ցանկանում խոսել այդ մասին՝ համարելով այն կոնֆլիկտածին»,- նշել է Քոչարյանը՝ հավելելով, որ իշխանությունները նման կերպ են համարում այն ամենը, ինչը կարող է Ալիևի սրտով չլինել։ Ըստ նրա՝ բանակցային գործընթացը բարդ է, սակայն դրանից հրաժարվելը մեծ սխալ է։

Source: https://news.am/hy/news/1035482