Ամերիկյան արվեստի աշխարհում հնչեղ սկանդալը ավարտվեց մեղքի ընդունմամբ․ Նյու Ջերսիից հայր ու դուստր՝ Էրվին Բանկովսկին և Կարոլինա Բանկովսկին (Լեհաստանից ներգաղթածներ), պաշտոնապես խոստովանեցին լայնածավալ խարդախությունը։ Օգտագործելով իրենց հմայքը, տպագրության ժամանակակից տեխնոլոգիաները և անհայտ լեհ նկարչի տաղանդը՝ նրանք 2020-ից 2025 թվականներին պատրաստել և վաճառել են ավելի քան 200 կեղծ նկար, գրում է NYP-ը։

Նրանց զոհերն են դարձել Նյու Յորքի հեղինակավոր պատկերասրահներն ու աճուրդային տները, այդ թվում՝ Bonham’s-ը, Phillips-ը և Freeman’s-ը։ Հանցավոր ընտանեկան բիզնեսը հանցակիցներին առնվազն 2 միլիոն դոլար է բերել։

Սկզբում Էրվինն ու Կարոլինան զբաղվում էին օրինական բիզնեսով․ իրենց Art Sector ընկերության միջոցով նրանք ԱՄՆ-ում վաճառում էին քիչ հայտնի նկարիչների կտավներ։ Դրանք հաճելի, բայց ոչ թանկ ինտերիերային աշխատանքներ էին։

Ամեն ինչ փոխվեց, երբ նրանք Լեհաստանում գտան աներևակայելի տաղանդավոր մի վարպետի (նրա անունը քննությունը դեռ չի հրապարակում)։ Հասկանալով, որ նա կարող է վարպետորեն կրկնօրինակել մեծ նկարիչների ձեռագիրը, հարազատները դրանում ոսկու հանք տեսան։ Ինքնին նկարի վերարտադրությունը հանցագործություն չէ, սակայն Բանկովսկիները սկսեցին այդ կրկնօրինակները ներկայացնել որպես բնօրինակներ․

Էնդի Ուորհոլ․ մերկ տղամարդու և կնոջ պատկերող կեղծ աշխատանքը վաճառվել է 5500 դոլարով։ Վաճառողները օգտագործել են նորագույն տպիչներ և արհեստականորեն հնացրած թուղթ՝ դարձնելով վերարտադրությունները բնօրինակներից գրեթե չտարբերվող։

Բենքսի․ սովորական ստվարաթղթի վրա տպված կեղծիքը (վարդագույն ժապավենով ռազմական ուղղաթիռ) վաճառվել է 2000 դոլարով։ Բենքսիի իսկությունը ստուգելը միշտ դժվար է, քանի որ փողոցային նկարիչը աշխատում է տրաֆարետներով։

Ռիչարդ Մեյհյու․ աֆրոամերիկացի, հնդկացիական արմատներով հայտնի այս բնանկարիչի կեղծ կտավը խաբեբաներին բերել է ամենախոշոր միանվագ հասույթը՝ 160 000 դոլար։

Որպեսզի նկարները կասկած չհարուցեն, հայրն ու դուստրը գրաֆիկական խմբագրիչների միջոցով կեղծում էին իսկության վկայագրերը՝ դրանք փակցնելով շրջանակների հետևի մասերին։

Շիկահերի հմայքը և «Երեք նավակների» վրիպումը

Խաբված փորձագետներից մեկը Ռոբերտ Ռոգալն էր՝ Լոնգ Այլենդ Սիթիում գտնվող հայտնի RoGallery պատկերասրահի սեփականատերը, որի պահոցներում պահվում է ավելի քան 10 000 բնօրինակ։ Նրա արվեստանոց էր եկել նրբագեղ 26-ամյա շիկահեր Կարոլինան, ձեռքին՝ նկարիչ Ռիչարդ Անուշկևիչի կտավը։ Աղջիկը սիրալիր ժպտում էր և վստահեցնում, թե դա «ընտանեկան մասունք» է։

«Ես իմպուլսիվ գնորդ եմ, բայց գիտեմ՝ ինչ հարցնել՝ որտեղի՞ց է այս իրը, որտե՞ղ են կտրոնները։ Այս կինը ինձ բացարձակ ազնիվ և վստահության արժանի թվաց», — հիշում է Ռոգալը The NY Post-ին տված հարցազրույցում։

Նկարը կատարված էր անթերի, ստորագրությունը համապատասխանում էր բնօրինակին, իսկ հիմքի համար օգտագործվել էր պերֆորացված սալիկ՝ նյութ, որի հետ Անուշկևիչն իսկապես փորձարկումներ էր անում 1960-ականներին։ Ռոգալը Կարոլինային 5000 դոլարի չեկ է դուրս գրել, ապա կտավը վերավաճառել առցանց աճուրդում ինչ-որ հիմնադրամի՝ արդեն 15 000 դոլարով։

Հաջողությունից ոգևորված՝ Կարոլինան վերադարձավ և փորձեց Ռոգալին վաճառել կեղծ Էնդրյու Ուայեթ։ Բայց այս անգամ պատկերասրահի տերը կասկածեց․ հայտնի Knoedler պատկերասրահի «իսկության կնիքը» չափազանց թարմ տեսք ուներ։ Ռոգալը հարցում ուղարկեց Ուայեթի հիմնադրամ, որտեղ նկարը կեղծ ճանաչվեց։ Կարոլինային զանգահարեցին՝ խնդրելով վերցնել կտավը, բայց նա այլևս պատկերասրահում չհայտնվեց։

Շուտով քարտե տնակը փլվեց։ Լատվիա-ամերիկացի նկարիչ Ռայմոնդ Ստապրանսի շահերը ներկայացնող փորձագետները կասկածեցին, որ աճուրդի հանված «Երեք նավակներ» նկարը (որը վաճառվել էր 60 000 դոլարով) կոպիտ կեղծիք է։ Գործին միացավ ՀԴԲ-ն։ Գործակալները արագ դուրս եկան Բանկովսկիների վրա և կապվեցին բոլոր գնորդների հետ, ներառյալ Ռոգալը։ Ազնիվ պատկերասրահատերը անմիջապես չեղարկեց Անուշկևիչի գործարքը և հաճախորդին սեփական հաշվին վերադարձրեց գումարը։

Էրվին և Կարոլինա Բանկովսկիները ձերբակալվեցին։ Էլեկտրոնային կապի միջոցներով իրականացված խարդախությունից բացի, նրանց առաջադրվեց նաև հազվադեպ մեղադրանք՝ Ամերիկայի հնդկացիների արհեստների մասին օրենքի խախտում (Մեյհյուի և Ֆրից Շոլդերի կեղծ աշխատանքները բնիկ ամերիկացիների գործեր ներկայացնելու համար)։

Հայրն ու դուստրը լիովին ընդունել են մեղքը։ Այս հոդվածներով առավելագույն պատիժը մինչև 20 տարվա ազատազրկումն է, բայց քննության հետ գործարքի շնորհիվ նրանք, ամենայն հավանականությամբ, կստանան մոտ 3 տարի։ Քանի որ մեղադրյալները ԱՄՆ քաղաքացիներ չեն, ազատ արձակվելուց անմիջապես հետո նրանց սպասում է հարկադիր արտաքսում Լեհաստան։

Ինչ վերաբերում է առգրավված կեղծիքներին, Ռոբերտ Ռոգալը դրանցից երկուսը մինչ օրս պահում է իր պատկերասրահում և չգիտի՝ ինչ անել դրանց հետ։ Լրագրողների հարցին, թե ինչպես կվերաբերվեր հանգուցյալ Անուշկևիչը նրան կեղծելու փաստին, Ռոգալը ժպտալով պատասխանել է․ «Հավանաբար շոյված կլիներ։ Որոշ նկարիչներ բարկանում են, իսկ մյուսները դրանում տեսնում են իրենց մշակութային հսկայական ազդեցության ընդունումը»։

Source: https://news.am/hy/news/1039921