Թրամփը իր բուժզննության արդյունքներով հայտարարել է «էքստրեմալ ինտելեկտի» մասին

ԱՄՆ նախագահ Դոնալդ Թրամփը Truth Social սոցցանցում հայտնել է, որ Ուոլթեր Ռիդի անվան ռազմական բժշկական կենտրոնում իր վերջին բուժզննության արդյունքները եղել են «չափազանց լավ»։

Թրամփը հայտարարել է, որ անցել է հաստատված բարձր բարդության ճանաչողական թեստ և ստացել առավելագույն արդյունք՝ հնարավոր 30-ից 30 միավոր։

Ըստ նրա, սա իր կյանքի ընթացքում արդեն չորրորդ նման թեստն է, և ամեն անգամ նա ցուցադրել է անթերի արդյունք։

«Ի տարբերություն ԱՄՆ մյուս նախագահների, որոնցից ոչ մեկը երբեք չի անցել հաստատված բարձր բարդության ճանաչողական թեստ, ես ստացել եմ իդեալական 30-ը 30-ից, ինչը համարվում է էքստրեմալ ինտելեկտ», — գրել է Թրամփը։

Նա նաև պնդում է, որ ընդհանուր առմամբ ճիշտ է պատասխանել 120 հարցից 120-ին՝ չորս անընդմեջ թեստավորման ընթացքում։

Ամերիկացի առաջնորդը նման արդյունքը բնութագրել է որպես չափազանց հազվադեպ և այն կապել է մտավոր ունակությունների բարձր մակարդակի հետ։ Բացի այդ, նա կրկին քննադատել է Դեմոկրատական կուսակցության ներկայացուցիչներին, որոնց հրապարակման մեջ անվանել է «Dumocrats»՝ բառախաղ, որը միավորում է կուսակցության անվանումը և dumb («հիմար») անգլերեն բառը։

Թրամփը նաև առաջարկել է ճանաչողական թեստերը պարտադիր դարձնել ԱՄՆ նախագահի և փոխնախագահի պաշտոնի բոլոր թեկնածուների համար։

Նրա կարծիքով, նման պահանջը պետք է առաջ մղեն Կոնգրեսը և Դեմոկրատական կուսակցության ներկայացուցիչները։

Source: https://news.am/hy/news/1039705