Շրջանառվող բոլոր լուրերը և այսպես կոչված հետաքննությունները «ռուսական հետքի» կամ արտերկրում ունեցվածքի մասին իշխանամետ քարոզչության նախապատրաստուկներն են, որոնք կոչված են շեղելու հասարակությանը, որը մահու չափ հոգնել է Փաշինյանից և պահանջում է նրա անհապաղ հեռացումը։ Այդ մասին մայիսի 26-ին Հակակոռուպցիոն դատարանի շենքի մոտ լրագրողների հետ զրույցում հայտարարել է «Ուժեղ Հայաստան» կուսակցությունների դաշինքի ղեկավար Սամվել Կարապետյանը։

Նա ընդգծել է, որ իր իրավաբանների թիմն անհրաժեշտության դեպքում իրավական գնահատական կտա մամուլում ցանկացած նման հրապարակման, եթե դրանք ուշադրության արժանի համարի։ Մեկնաբանելով իր եղբորորդի՝ Նարեկ Կարապետյանի՝ Ռուսաստանի քաղաքացիություն ունենալու վերաբերյալ հարցերը՝ քաղաքական գործիչը վճռականորեն հերքել է այդ տեղեկությունը։

Հիշեցնենք, որ ավելի վաղ The Insider պարբերականը նյութ էր հրապարակել, որում պնդում էր արվում, թե Սամվել Կարապետյանն իբր կապված է ռուսական հատուկ ծառայությունների հետ և ներգրավված է հայկական գործող իշխանությանը հեռացնելու ծրագրերում, ինչպես նաև այն մասին, որ «Ուժեղ Հայաստան» կուսակցությունների դաշինքի պատգամավորության թեկնածուների համամասնական ցուցակը գլխավորող Նարեկ Կարապետյանը Ռուսաստանի քաղաքացիություն ունի։ Այս տեղեկությունը հաջորդ օրը հերքեցին ինչպես ինքը՝ Նարեկ Կարապետյանը, այնպես էլ Ռուսաստանի փոխարտգործնախարար Միխայիլ Գալուզինը։

Source: https://news.am/hy/news/1038580