ԱՄՆ-ում ձերբակալել են կուբայական GAESA կոնգլոմերատի գործադիր նախագահի քույր Ադիս Լաստրես Մորերային։ Այդ մասին հայտնել է Միացյալ Նահանգների պետքարտուղար Մարկո Ռուբիոն։

«Ադիս Լաստրես Մորերան GAESA-ի գործադիր նախագահի քույրն է։ Այսօր նա ձերբակալվել է և գտնվում է ԱՄՆ-ի ներգաղթի և մաքսային վերահսկողության ծառայության (ICE) կալանքի տակ», — գրել է նա X սոցիալական ցանցում։

Ռուբիոյի խոսքով՝ Մորերան կառավարում էր անշարժ գույքի ոլորտի ակտիվները և բնակվում էր Ֆլորիդայում՝ միաժամանակ աջակցություն ցուցաբերելով կուբայական ռեժիմին։ Պետքարտուղարը նշել է, որ ավելի վաղ զրկել էր նրան մշտական ռեզիդենտի կարգավիճակից։

Ռուբիոն հավելել է, որ օտարերկրյա այն քաղաքացիները, որոնք սպառնում են ԱՄՆ ազգային անվտանգությանը, չեն կարողանա երկրի տարածքում «շքեղության մեջ ապրել»։

Նույն օրը Ռուբիոն նաև հայտարարել է, որ Վաշինգտոնը կգերադասեր Կուբայի հետ հարաբերությունները կարգավորել դիվանագիտական ճանապարհով, սակայն նման սցենարի հավանականությունը ներկայումս մնում է ցածր։ Նա հավելել է, որ ԱՄՆ-ը պատրաստ է երկխոսության, եթե կուբայական իշխանությունները փոխեն իրենց դիրքորոշումը, սակայն առայժմ Վաշինգտոնը մտադիր է շարունակել Հավանայի նկատմամբ ճնշման քաղաքականությունը։

Source: https://news.am/hy/news/1037387