Նիգերիացի քաղաքական գործիչը, որը պնդում էր, թե թզուկություն ունի, հանել է իր թեկնածությունը Նիգերիայի խորհրդարանական ընտրություններից՝ տարիքի հետ կապված մախինացիաների մեղադրանքների պատճառով։ Այս մասին հայտնել է Daily Star թերթը։

Պարբերականի տեղեկություններով՝ Մահմուդ Սադիս Բուբան պնդում էր, որ իր 30 տարեկանում մանկական արտաքին ունենալը ժառանգական թզուկության արդյունք է, սակայն համացանցում վերջերս հայտնված քաղաքական գործչի հնարավոր անձնագրի համաձայն՝ Բուբան կարող է 16 տարեկանից էլ փոքր լինել։

Նշվում է, որ Բուբան առաջադրվել էր որպես Նիգերիայի Ազգային ժողովի անդամի թեկնածու APC կուսակցությունից և իր կողմնակիցներին վստահեցնում էր, որ հպարտանում է իր արտաքինով։ «Իմ ընտանիքի, քաղաքական համախոհների և մեր մեծ կուսակցության շահագրգիռ կողմերի հետ երկարատև խորհրդակցություններից հետո ես որոշեցի, որ այս քայլը բխում է APC-ի լավագույն շահերից»,- գրել է Բուբան Facebook-ում։

Source: https://news.am/hy/news/1038412