Մերձավոր Արևելքում իրավիճակը շարունակում է մնալ լարված և անկայուն։ Իսլամաբադում Իրանի և ԱՄՆ-ի միջև բանակցությունների մասին հաղորդումները արտացոլում են միայն երկխոսություն հաստատելու փորձերը. շփումները կրում են անկանոն բնույթ և առայժմ արդյունք չեն տվել։

Միևնույն ժամանակ Իսրայելը, չնայած հայտարարված հրադադարին, շարունակում է հարվածներ հասցնել Լիբանանի տարածքին, ինչը վկայում է հրադադարի ռեժիմի փաստացի խախտման մասին։ Ընդհանուր առմամբ, տարածաշրջանը շարունակում է գտնվել ձգձգվող էսկալացիայի վիճակում, իսկ հետագա սրման ռիսկերը պահպանվում են։

NEWS.am ներկայացնում է ուրբաթ գիշերը Մերձավոր Արևելքում տեղի ունեցած կարևոր իրադարձությունների համառոտ ակնարկը։

Al Jazeera հեռուստաալիքը հայտնել է պակիստանցի բարձրաստիճան պաշտոնյաների ինտենսիվ միջնորդական գործունեության մասին։ Պակիստանի ներքին գործերի նախարարը գտնվում է Թեհրանում, և սա նրա երկրորդ այցն է մեկ շաբաթվա ընթացքում։

The Washington Post թերթը, հղում անելով իրազեկ ամերիկացի պաշտոնյայի, հայտնել է, որ Պենտագոնը ռազմական գործողությունների ընթացքում Իրանի հարձակումներից Իսրայելը պաշտպանելու համար սպառել է THAAD համակարգերի հակահրթիռային զինանոցի կեսը։

Հորմուզի նեղուցի փակումը մինչև օգոստոս կարող է հանգեցնել տնտեսական անկման ռիսկի աճի, որը իր մասշտաբով համադրելի կլինի 2008 թվականի ճգնաժամի հետ։ Այդ մասին մայիսի 22-ին հայտնել է Bloomberg գործակալությունը՝ հղում անելով աղբյուրներին։

Թեհրանն ու Վաշինգտոնը դեռևս համաձայնության չեն հասել, սակայն կողմերի միջև հակասությունները նվազել են։ Այդ մասին հայտնել է Reuters գործակալությունը՝ հղում անելով իրանցի բարձրաստիճան աղբյուրի։ «ԱՄՆ-ի հետ համաձայնություն դեռ չկա, բայց տարաձայնությունները կրճատվել են», — ասվում է նյութում։

Source: https://news.am/hy/news/1037381