Մերձավոր Արևելքում իրավիճակը մնում է լարված և անկայուն։ Իրանի և ԱՄՆ-ի միջև բանակցությունների մասին հաղորդումները արտացոլում են միայն երկխոսություն հաստատելու փորձերը։ Միևնույն ժամանակ Իսրայելը, չնայած հայտարարված հրադադարին, շարունակում է հարվածներ հասցնել Լիբանանի տարածքին, ինչը վկայում է հրադադարի ռեժիմի փաստացի խախտման մասին։ Ընդհանուր առմամբ, տարածաշրջանը մնում է երկարատև էսկալացիայի վիճակում, և հետագա սրման ռիսկերը պահպանվում են։

NEWS.am-ը ներկայացնում է կիրակի լուսաբացի դրությամբ Մերձավոր Արևելքում տեղի ունեցած առանցքային իրադարձությունների համառոտ ակնարկը։

• Իրանի զինված ուժերի կենտրոնական «Խաթամ ալ-Անբիա» շտաբը հայտարարել է, որ Հորմուզի նեղուցում նավարկության կառավարումն իրականացվում է Իսլամական Հանրապետության զինված ուժերի կողմից՝ «լիակատար վճռականությամբ և լիակատար վերահսկողությամբ»։

Հայտարարության մեջ շեշտվում է, որ բոլոր առևտրային նավերը, քաղաքացիական նավերը և նավթատար լցանավերը պարտավոր են շարժվել բացառապես սահմանված երթուղիներով և անցման թույլտվություն ստանալ Իսլամական հեղափոխության պահապանների կորպուսի ռազմածովային ուժերից։

• Լիբանանի վարչապետ Նավաֆ Սալամը դատապարտել է երկրի հարավում իսրայելական ռազմական գործողությունների սաստկացումը՝ տեղի ունեցողը որակելով որպես «վտանգավոր և աննախադեպ էսկալացիա»։

Նա կոչ է արել անհապաղ դադարեցնել կրակը և հայտարարել, որ «այրված հողի» քաղաքականությունը չի կարող ապահովել Իսրայելի անվտանգությունը։

• Ամերիկյան լրատվամիջոցները հայտնել են, որ ԱՄՆ նախագահ Դոնալդ Թրամփը խստացրել է Իրանի նկատմամբ իր պահանջները․ նա խնդրել է մի քանի փոփոխություն մտցնել այն համաձայնագրում, որին իր հատուկ ներկայացուցիչները հասել էին Իրանի հետ։

Սպիտակ տան ներկայացուցիչը հանդիպումից հետո լրագրողներին ասել է, որ Թրամփը «կկնքի միայն այնպիսի գործարք, որը օգտակար կլինի Ամերիկային, կբավարարի նրա պահանջները և կապահովի, որ Իրանը երբեք չկարողանա միջուկային զենք ունենալ»։

Source: https://news.am/hy/news/1039701