Մալայզիայի կառավարությունը պաշտոնապես մեկնարկել է թվային անվտանգության լայնածավալ բարեփոխումը՝ օրենսդրորեն արգելելով 16 տարեկանից փոքր միլիոնավոր երեխաների և դեռահասների ունենալ սոցիալական ցանցերի հաշիվներ։ Այսպիսով, երկիրը միացել է այն պետությունների աճող թվին, որոնք փորձում են պաշտպանել անչափահասների հոգեկան առողջությունը առցանց կործանարար ազդեցությունից։

Նոր կանոնները պարտավորեցնում են ՏՏ հսկաներին ներդնել տարիքային խիստ վերիֆիկացման համակարգեր և արգելափակել 16 տարեկանից փոքր օգտատերերի կողմից գրանցման ցանկացած փորձ, հայտնում է AP-ը։

Թիրախում տեխնոհսկաներն են, ոչ թե ծնողները

Կարգավորումը կվերաբերի բոլոր այն հարթակներին, որոնց լսարանը Մալայզիայում գերազանցում է 8 միլիոն մարդը։ Այս ցանկում ինքնաբերաբար հայտնվել են Facebook-ը, Instagram-ը, TikTok-ը և YouTube-ը։

Պահանջները չկատարելու կամ տարիքի ստուգման հարցում անփութության համար ՏՏ ընկերություններին սպառնում է հսկայական տուգանք՝ մինչև 10 միլիոն ռինգգիտ (2.5 միլիոն դոլար)։

Հատկանշական է, որ օրենքը որևէ պատիժ չի նախատեսում այն ծնողների համար, որոնց երեխաները կգտնեն շրջանցման ուղի և կկարողանան հաղթահարել արգելափակումը։

Իշխանությունները շեշտում են, որ բարեփոխման նպատակը երեխաներին ինտերնետից և տեխնոլոգիաներից մեկուսացնելը չէ, այլ մատակարարներին ստիպելը ստեղծել անվտանգ թվային միջավայր։ Հարթակները պարտավոր կլինեն արմատախիլ անել այսպես կոչված «մանիպուլյատիվ դիզայնը»՝ ալգորիթմները, որոնք միտումնավոր կախվածություն են առաջացնում և ստիպում դեռահասներին ժամերով պտտել լրահոսը։

Մալայզիան իր խիստ դիրքորոշմամբ ամենևին միայնակ չէ։ Տարբեր աստիճանի սահմանափակումներ արդեն ներդրել կամ հայտարարել են Ավստրալիան, Բրազիլիան և Ինդոնեզիան։ Բացի այդ, նմանատիպ սցենարներ այժմ ակտիվորեն ուսումնասիրվում և մշակվում են նաև Մեծ Բրիտանիայում, Ֆրանսիայում, Իսպանիայում, Դանիայում, Թաիլանդում և Հարավային Կորեայում։

ՏՏ ոլորտի վրա ճնշումն ուժեղանում է նաև դատական նախադեպերի հաշվին։ Այսպես, այս տարվա մարտին ԱՄՆ-ում երդվյալների դատարանը պարտավորեցրել է Meta-ին և YouTube-ին վճարել բազմամիլիոնանոց փոխհատուցումներ ըստ հայցի, որում պնդվում էր, որ հարթակների ալգորիթմները ծանր վնաս են հասցրել անչափահաս օգտատիրոջ հոգեկան առողջությանը։

դա պարզապես դեռահասներին դուրս կմղի պաշտպանված և մոդերացվող հավելվածներից դեպի ինտերնետի մոխրագույն, բացարձակապես չկարգավորվող անկյուններ։ Որպես այլընտրանք՝ Meta-ն առաջարկում է ներդնել «պատանեկան հաշիվներ»՝ էկրանի ժամանակի ավտոմատ սահմանափակմամբ և բովանդակության խիստ ֆիլտրով։

Փորձագետները նույնպես համակարծիք են, որ առանց ծնողների համար պատասխանատվություն սահմանելու օրենքը կմնա կիսատ միջոց, քանի որ մեծահասակները հեշտությամբ կկարողանան շրջանցել արգելքները՝ պարզապես իրենց անունով հաշիվներ գրանցելով և դրանք երեխաներին փոխանցելով։ Այս պահին Մալայզիայի կարգավորող մարմինը սոցցանցերին տրամադրել է ժամանակավոր գրեյս-ժամկետ՝ տարիքի ստուգման համակարգերի տեխնիկական կարգաբերման համար։

Source: https://news.am/hy/news/1039919