Թուրքիայի նախագահ Ռեջեփ Թայիփ Էրդողանը ԱՄՆ նախագահ Դոնալդ Թրամփի հետ հեռախոսազրույցի ընթացքում քննարկել է երկկողմ, տարածաշրջանային և գլոբալ հարցերի լայն շրջանակ։ Այս մասին հայտնում է Թուրքիայի նախագահի աշխատակազմի հանրային կապերի վարչությունը, գրում է Türkiye Today-ը։

Էրդողանը «դրական զարգացում» է անվանել Իրանի հետ հրադադարի ռեժիմի երկարաձգման մասին որոշումը՝ հավելելով, որ իր կարծիքով՝ «վիճելի հարցերի ողջամիտ լուծումը հնարավոր է»։ Նա նշել է, որ Թուրքիան կշարունակի սատարել տարածաշրջանում շարունակվող հակամարտությունների կարգավորմանն ուղղված կառուցողական ջանքերին։

Հայտարարության մեջ չի հստակեցվում, թե որ կողմերն են մասնակցում հրադադարի համաձայնագրին, ինչպես նաև հավելյալ մանրամասներ չեն հաղորդվում վիճելի հարցերի բնույթի վերաբերյալ։

Թուրքիայի նախագահն ընդգծել է, որ Սիրիայում կայունության ամրապնդումը «կդառնա կարևոր ձեռքբերում ողջ տարածաշրջանի համար», և խոստացել է, որ Անկարան շարունակական աջակցություն կցուցաբերի Սիրիային։

Նա նաև մտահոգություն է հայտնել Լիբանանում տիրող իրավիճակի կապակցությամբ՝ շեշտելով երկրում իրադրության հետագա վատթարացումը կանխելու անհրաժեշտությունը։

Էրդողանը Թրամփին տեղեկացրել է, որ Անկարայում կայանալիք ՆԱՏՕ-ի գագաթնաժողովի նախապատրաստական աշխատանքները հաջող են ընթանում, և գործադրվում են առավելագույն ջանքեր՝ հանդիպումը բոլոր առումներով հաջողված դարձնելու համար։

Source: https://news.am/hy/news/1037179