Կիրակի վաղ առավոտյան Չինաստանի հարավարևմտյան Յուննան նահանգի Հույձզե գավառում օգտակար հանածոների ապօրինի արդյունահանման ժամանակ տեղի ունեցած փլուզման հետևանքով հինգ մարդ է զոհվել, ևս մեկը՝ վիրավորվել, հաղորդում է Սինհուա գործակալությունը։

Տեղական իշխանությունների տվյալներով, միջադեպը տեղի է ունեցել տեղական ժամանակով առավոտյան մոտ 04:30-ին, Հույձզե գավառի Նագու ավանի Բայու գյուղում։ Ցյուցզին քաղաքի և Հույձզե գավառի արտակարգ արձագանքման, հասարակական անվտանգության, հրշեջ ծառայության, ինչպես նաև առողջապահության ու բնական պաշարների գերատեսչությունները օպերատիվորեն սկսել են փրկարարական գործողությունը։ Արգելափակված բոլոր վեց անձանց հաջողվել է դուրս բերել և շտապ տեղափոխել հիվանդանոց՝ բժշկական օգնություն ցուցաբերելու համար։

Փրկվածներից հինգը, չնայած բժիշկների ջանքերին, մահացել են ստացած վնասվածքներից։ Փրկված մեկ անձի վիճակը ներկայումս կայուն է, նրա կյանքին վտանգ չի սպառնում։ Դեպքի պատճառների վերաբերյալ քննություն է ընթանում։

Source: https://news.am/hy/news/1039760