Պարսից ծոցի երկրների առաջնորդները ԱՄՆ նախագահ Դոնալդ Թրամփի հետ շաբաթ օրը կայացած բանակցությունների ընթացքում Վաշինգտոնին կոչ են արել անվտանգության երաշխիքներ կորզել Իրանից՝ իրենց պետությունների համար։ Այս մասին, հղում անելով իր աղբյուրներին, հայտնել է The Wall Street Journal թերթը։

Պարբերականի տվյալներով՝ Սաուդյան Արաբիայի, Արաբական Միացյալ Էմիրությունների և տարածաշրջանի այլ երկրների առաջնորդները մտահոգված են ԱՄՆ-ի և Իրանի միջև հնարավոր համաձայնագրի կնքմամբ, որը չի ներառի Թեհրանի հրթիռային ծրագրին վերաբերող կետերը։ Ինչպես նշում է թերթը, բանակցությունների ընթացքում դեռևս չի քննարկվել հրթիռային ծրագիրը։ Ծոցի երկրների ղեկավարները մտավախություն ունեն, որ նոր էսկալացիայի դեպքում կարող են տուժել իրենց տարածքում գտնվող էներգետիկ օբյեկտները։

Միևնույն ժամանակ Պարսից ծոցի պետությունները Թրամփի հետ բանակցությունների ընթացքում նրան կոչ են արել հնարավորինս շուտ հասնել Իրանի հետ համաձայնության՝ մատնանշելով հակամարտության բացասական տնտեսական հետևանքները։

Փետրվարի 28-ին ԱՄՆ-ն և Իսրայելը ռազմական գործողություն են սկսել Իրանի դեմ։ Ապրիլի 7-ին ԱՄՆ նախագահ Դոնալդ Թրամփը հայտարարել է Իսլամական Հանրապետության հետ երկշաբաթյա փոխադարձ հրադադարի մասին։ Ապրիլի 11-ին Թեհրանն ու Վաշինգտոնը բանակցություններ են անցկացրել Իսլամաբադում, սակայն չեն կարողացել համաձայնության հասնել հակամարտության երկարաժամկետ կարգավորման հարցում։ Ապրիլի 21-ին ԱՄՆ առաջնորդը հայտարարել է Իրանի հետ հրադադարի ռեժիմը երկարաձգելու մտադրության մասին։ Մայիսի 19-ին Թրամփը հայտարարել է, որ Միացյալ Նահանգները պատրաստ է մինչև հաջորդ շաբաթվա սկիզբը հնարավորություն տալ դիվանագիտությանը Իրանի շուրջ հակամարտությունում՝ այդ ժամկետով հետաձգելով ռազմական գործողությունների վերսկսումը։ Մայիսի 23-ին ամերիկացի առաջնորդը նշել է, որ Իրանի հետ ապագա համաձայնագրի նախագիծն ընդհանուր առմամբ համաձայնեցված է, սակայն հաջորդ օրը տեղեկացրել է, որ կողմերը դեռևս չեն կարողացել վերջնական պայմանավորվածության հասնել որոշ հարցերի շուրջ։

Source: https://news.am/hy/news/1038123